Алай йисалай башламишна, Россиядин мулкунал, ахтармишунин къайдада аваз, гъвечIи ва юкьван карчивал (МСП) патал Рекъемрин платформадин кIвалах башламиш хьанва. Идакай МСП-дин корпорациядин пресс-къуллугъди хабар гузва.
Карчийриз куьмек гунин государстводин платформа МСП-дин корпорацияди РФ-дин экономикадин рекьяй виликди финин министерстводихъ галаз санал туькIуьрнава. Карчивилиз куьмек гунин милли проектдин сергьятра аваз арадал гъанвай ада государстводин ва алишверишдин бинедаллаз кIвалахзавай сервисар ва къуллугъар бизнес патал тIем акакьдайбур авун лазим я.
“Алай вахтунда платформада жуван кар гъиле кьун ва лазим къайдада кьиле тухун патал куьмекдин 11 онлайн-сервис ишлемишиз жезва. Йисан эхирдалди абурун кьадар 15-далай артух жеда. Сервисар гьихьтинбур жедатIа, платформа туькIуьрунин карда иштиракай карчийри чпи хкянава ва тайинарнава”, — лугьузва малуматда.
Платформади менфятлу тир са жерге къуллугъар санал кIватIнава: ФНС-дин ва Центробанкдин делилрин бинедаллаз бизнесдин рейтинг гьихьтинди ятIа тайинарун, законриз талукь дайджест (алай вахтунда бизнесдиз талукь тир вири законар (эхиримжи дегишвилер) ва абурун гъавурда гьатун патал лазим тамам делилар, баянар), виридалайни гзаф герек жезвай документрин шаблонар авай конструктор, 10 миллион манатдив агакьдалди кредит къачун патал санлай са шумуд банкдиз арзаяр ракъурдай мумкинвал гузвай, вичиз тешпигь авачир сервис ва икI мад.
Идалайни гъейри, бизнес гъиле кьаз кIанзавай карчийривай са шумуд декьикьадин вахтунда чпиз къулай жедай ихтияррин ва налогрин къайда хкягъиз, гьакIни, госпошлина тагана ва налогрин идарадиз тефена, бизнес регистрация ийидай арза рекье тваз жеда.
Сервисдин важиблу пай адакай ибарат я хьи, ада региондин патайни куьмек ишлемишдай мумкинвал гузва. Гьелелиг адак уьлкведин 10 региондай тир 37 къуллугъ кутунва. Гуьзлемишзавайвал, 2022-йисан эхирдалди адак РФ-дин амай вири регионарни кутада.
«Лезги газет»
