Макъаладин игит Кьурагьрин 1-нумрадин умуми обра­зованидин юкьван школада урус чlаланни литературадин муаллим яз кlвалахзавай, Дербент шегьерда кьиле фейи “Йисан муаллим-2022” конкурсдин зонадин паюна 2-чка кьур Ирада Агьмедовна Урдиханова  я.

Ам 1990-йисуз Кьурагьа, “Тади куьмек” машиндал шо­фер яз кlвалахзавай Агьмед Урдиханован хизанда дидедиз хьана. 2005-йисуз агалкьунралди 9-класс акьалтlар­на, Дербентдин педучилищедин сифтегьан классрин муаллимвилин отделенидик экечlна. Лап хъсан къиметралди 2010-йисуз училище акьалтlарна, ам кlвалахиз хайи школадиз хтана. Кlвалахдивай къерех тахьана, вичин пешекарвилин дережа “Юждаг” институтда давамарна. Эхиримжи вад йисуз школадин урус чlаланни литературадин муаллимрин методикадин объединенидин кьиле ава.

Ирада Агьмедовнади вичин кьилин агалкьун эхиримжи йисара райондин “Живая классика” конкурсда, предметрин олимпиадайра ва сочиненияр кхьинай аялри кьазвай хъсан чкаяр яз гьисабзава.

Чи арада хьайи суьгьбетдай малум хьайивал, ада вичин сад лагьай выпускникрин нетижайрал дамахзава. Муаллимдивай тIугъвалдин четин шартlара арада яргъал мен­зил аваз кlелзавайбур, образованидин асул месэлайриз кьецl тагана, активнидаказ кардик кутуна, абурун чирвилер мягькемариз алакьна ва нетижада вижевай балларни къачуна: предметдай юкьван балл 71 я, виридалайни виниз балл — 98.

• Вун муаллимрин конкурсдик гьикl хьана экечlайди я? — хабар кьуна за.

— За эхиримжи йисара районда кьиле физвай конкурсрин муниципальный паюна иштиракзавайбуру вуч ийиз­ватlа ахтармишиз хьана. ГьакIни жуван къуватар ахтармишна. Гьа икl, зазни и конкурсда иштиракиз кlан хьана.

“Йисан муаллим” конкурсда иштиракзавайбур патал Махачкъалада вердишардай семинарни кьиле тухвана.    Ана авай тежрибалу муаллимар акурла, заз са тlимил кьван къурхуни хьана, — давамарзава вичин суьгьбет ада. — Ахпа абурухъ галаз ихтилатар авурла, абурун патай авай хуш майилвал, за суалриз гузвай дуьз жавабар акурла, зун жув-жувахъ агъуна, зи къуватар артух хьана.

И.Урдихановади вичин конкурсдин тарс 11-классда ЕГЭ-диз гьазур жез вердишвилин тестер гьялзавай темадиз бахшна тухвана.

Комиссияди кьур нетижайрай малум хьайивал, конкурсда иштиракай кlуьд касдин арада Ирада Агьмедовнади кьвед лагьай чка кьуна.

— Сифте яз конкурсда иштиракна, кьвед лагьай чка кьун- им за гъалибвилиз барабарзава. И агалкьун захъ жедачир­, эгер за чи школадин коллективдин къуьн гьисс ийизва­чиртlа.

• Ирада Агьмедовна, ваз конкурс регьятдаказ кьиле фена лугьуз кlанзавани?

— Муаллимвилин гьар йикъан кlвалахда хьиз, конкурсдани регьят рекьер авачирди зун чlалахъ хьана. Конкурсди­ къалурайвал, предметдай гьикьван хъсан чирвилер аваз хьайитlани, муаллимдиз лап тамамдиз методикадин гьар жуьредин къайдаяр ишлемишдайвални чир хьана кlанзава. Икl хьайила, кlвалах виликди фида. Гележегда жедай конкурсра кlвенкlвечи чка кьун патал, за республикадин тежриба авай муаллимрихъ галаз алакъа хуьнни важиблу яз гьисабзава.

• Къуй вун ви рикlе авай мурадрив агакьрай, муаллим.

Къагьриман Ибрагьимов