Чаз кхьизва
Дуьньядал элкъвенвай залум тIугъвалди инсанар гьикьван бизарнава… Жуваз чидай хейлин ксар а завалди чавай къакъуднавайди гьикI чуьнуьхиз жеда?
Вирусди алатай вацра зунни Каспийскда кардик квай ковиддин махсус азарханадиз акъудна. Сифтедай кIвале саки цIуд юкъуз за кваз кьунач. Гьа им зи гъалатIни хьана.
Азарханадиз аватайла, зи гьал лап чIурузвай. Духтурри зун кьилдин палатадиз (боксдиз) акъудна. Гьа ина, за кьатIайвал, азарханадин вири духтурар, медработникар, михьивилер хуьзвай санитаркайрилай эгечIна, кьилин духтурдал агакьдалди, зи къайгъуда хьана. Зун 14 юкъуз ина амукьна. Духтурри зун саки мукьва хьанвай ажалдин къармахрай ахкъудна!
Зун жув-жувал хтана, гила, сагъ-саламат яз жуван багърийрин патав гва. Духтурри заз кьвед лагьай уьмуьр, зи мукьва-кьилийризни, балайризни кьадар авачир кьван шадвал хганва!
Гьавиляй заз чи багъри “Лезги газетдин” чинилай тIугъвалдин четин шартIара, югъ-йиф талгьана, азарлуйрихъ гелкъвезвай вири духтурриз — садакай масадак акатдай азарар сагъарзавай пешекарриз, санитаркайриз ва медсестрайриз рикIин сидкьидай сагърай лугьуз кIанзава. Къуй алукьнавай йис абурун кIвалера, хизанра мягькем сагъламвал, берекатар, бахтар галайди хьурай!
Кьилди заз и азарханада, кьетIен шартIар арадал гъана, хуьз алакьзавай кьилин духтур Расим Рагьимович Рамазанован, садакай масадак акатдай азаррин отделенидин заведующий А.Гьасановадин, захъ гелкъвей духтур А.Османовадин тIварар кьаз кIанзава. Абур гьакъикъатдани Аллагьди чпиз инсанар сагъардай пай ганвай, инсанвилин лап вини дережайрин сагьибар, халисан пешекарар тирдахъ зун кIевелай инанмиш хьана. Сагърай куьн вири!
Газет кIелзавайбурухъ элкъвена заз мадни лугьуз кIанзава: играмибур, ковиддин азар инсафсузди, гьич виливни хуьн тавур шартIара гатIум жедай завал я. Вахтунда адан вилик пад кьадай рапар ягъ тавуртIа, духтуррин теклифриз яб тагайтIа, эхир ерли хъсанди жезвач. Куьне куьн хуьх, куьне масабурузни чеб хуьз куьмек гуда!
Эльмира Фетуллаева,
Ярагъ-Къазмайрин юкьван
школадин муаллим, пенсионер
