И мукьвара Белиждин Хпеж микрорайондин жемятди субботник тешкилнавай. Ана иштиракиз кlанзавайбур гзаф авайтlани, Роспотребнадзордин истемишунрал амал авуна, субботникдиз са къад кас экъечlнавай.
Хпежвийри чеб яшамиш жезвай кlвалер, куьчеяр, микрорайон аваданламишунин карда иштиракун адетдиз элкъвенва. Райондин, поселокдин администрацийрин гъил агакь тийизвай, амма гьялна кlанзавай месэлаяр гзаф хьайила, хуьруьнвийри а месэлаяр, сад хьана, хсуси такьатрихъ кьилиз акъудзава.
Гзаф чlехи месэлаяр гьялиз тахьайтlани, халкьдин къуватдалди гьялиз жедай крарни ава. “Халкьдин къажгъан муркIадални ргада” лугьудайвал, и месэлаяр гьялунин мураддалди хуьре са кьуд йисан вилик мергьяматлувилин фонд ачухна. Аниз рагьметдиз фейибурун багърийри садакьайрин, хуьруьн карчийри — чпивай жедай кьван ва йисан къене гьар са кlвалин иесиди са агъзур манат пул язава.
Икl, кlватlай такьатрихъ сурарин жугъунар ремонтна, къуй эгъуьнна, анал кьурни эцигна, экверин линия тухун патал кьве шалман акlурна, эквер тухвана, кьейиди кучукдайла герек къвезвай алатар авай махсус кlвал ремонтна, КАМАЗ-дин са рейс къумни чиргъ ва бетондин 100 плитка гъана ичlирнава, 68 агъзур манатдихъ турбаяр маса къачуна, абур лазим чкайрик кутуна, 150 агъзур манатдай 400 квт-дин трансформатор маса къачуна. Первомайский куьчеда авай къанав эксковатордал михьна, аниз бетондин латар вегьена. Советский куьчеда авай газдин линиядин турбайриз шир яна, консервиярдай заводдилай микрорайондин школадал кьван авай ЛЭП-дин шалманрал йифен эквер эцигна ва икl мад.
— Хуьруьнвийри 8-январдиз сад лагьай субботник кьиле тухвана, — лугьузва мярекатдин тешкилатчи, “Хпеж” микрорайондин агъсакъалрин Советдин ва мергьяматлувилин фондунин председатель Абдулазиз Сефербегова. — Жуван хуьр, кlвал патал ийизвай кlвалах — им чlехи суваб я. Алай тlугъвалдин четин шартlара маса чкайрай хкизвай бязи кьейибур йифиз кучукуниз мажбур жезва. Ихьтин дуьшуьшра йифиз сурарал чпин везифаяр тамамарзавай инсанриз ва кьейиди эхиримжи рекье твазвайбуруз регьят хьун патал чна 150 метр токдин кабель ва пуд шалман маса къачуна, жемятдин куьмекдалди сурариз экв тухвана. 12-январдиз хуьруьн кьилихъ галай “Дербент-Граница” поездар къвезвай рекьел алай инсанар акъваззавай чка ремонтна, Советский, Ленинградский ва Гьажимурадован тlварунихъ галай куьчейрин агъа кьилера инсанриз ракьун рекьел экъечlиз регьят хьун патал шлакоблокрикай гурар эцигна, гурарин кьве кьилихъни галай гъвечlи майданриз къир цана. Дугъриданни, халкь сад хьайила, бегьем кlвалахар ийиз жезва, — лугьузва А.Сефербегова.
Жемият патал кьиле тухузвай хийирлу кIвалахра чпин хушуналди ва ашкъидалди иштиракзавайбурни тIимил авач. Абурун арада Айдемир Агьмедов, Анвер Гьажимурадов, Седредин Мисриев, Мукаил ва Гуьлбала Мамедовар, Керим ва Азиз Абдулкеримовар, Хизир Исмаилов, Али Гьасанов, Зулфикъар Рамазанов, Алим Тагъиев, Эрзиман Ибрагьимов, Ибрагьим Аюбов, Тагьир Кьасумов, Рамазан Османов ва хейлин масабур ава.
Къагьриман Ибрагьимов
