Дагъустандин образованидин ва илимдин министерстводин пресс-къуллугъди хабар гузвайвал, 1-февралдин делилралди, Дагъустанда хума ва коронавирус акатнавайбурун кьадар садлагьана гзаф хьунихъ галаз алакъалу яз 198 мектебда карантин малумарнава.
Идалайни гъейри, кIвалах давамарзавай 37 мектебдай 395 классда кIелзавай аялри чирвилер арада мензил аваз (дистанционно) къачузва. Арада мензил аваз санлай республикада 103 агъзурни 807 аялди кIелзава.
Министерстводин пресс-къуллугъдин делилралди, Дагъустанда 4563 муаллимдик — хума, 904-дак коронавирус акатнава.
Къейд ийин хьи, тIугъвалдихъ галаз алакъалу яз жуьреба-жуьре районра аялрин 30 бахчадани карантин малумарнава.
Коронавирус: эхиримжи рекъемар
РД-дин Роспотребнадзордин делилралди, 2-февралдиз Дагъустанда коронавирус акатайбурун кьадар 73 922-дав агакьнавай. Эхиримжи юкъуз коронавирус акатай 580 кас дуьздал акъудна.
Гьа са вахтунда духтуррилай начагъ хьайи 63 987 кас (эхиримжи юкъуз — 364) сагъар хъийиз алакьнава. Санлай къачурла, республикада 4 067 961 кас ахтармишнава. 7225 кас, амайбурукай чара авуна (изоляция), кIвалера ава. Дагъустанда коронавирусдик 3333 (эхиримжи юкъуз — 7) кас кьена.
«Лезги газет»
