Са шумуд югъ идалай вилик азаддаказ кьуршахар кьунай Красноярскда кьиле фейи “Иван Ярыгинан” Гран-При патал международный турнирда иштиракай пуд ватанэгьлидини чи руьгь хкажна. ИкI, Дагъустандин хкянавай команда и акъажунра кIвенкIве хьуник чи ватандашрини еке пай кутунва — къизилдин 4 медалдикай (гимишдин — 4 ва буьруьнждин 8 медаль квачиз) кьвед абуру къазанмишна…
Къизилдин 1-медаль чи республикадин хкянавай командадиз Шамил Мамедова (65 кг) гъана. Финалдин акъажунра чи кьве кьегьал — Ш.Мамедов ва Р.Ферзалиев — чеб-чпихъ галаз бягьсиниз экъечIун кьисмет хьана. Авайвал лагьайтIа, Шамила дуьньядин кIвенкIвечивал патал акъажунра, Хасавюртда кьиле фейи международный турнирда гъалибвилер къазанмишуналди вичикай хабар ганвайтIани, бягьсина чIехибурун арада гьасиррал фадлай вичин къуватар ахтармишзавай Рамазан гъалиб хьун гзафбуру вилив хуьзвай. Амма эхирдай кьиле тухвай гьужумра Шамила активвал, жуьрэтлувал ва къастунал кIевивал къалуруни бегьер тагъана тунач, бягьс 8:6 гьисабдалди адан хийирдиз акьалтIна. Рамазан Ферзалиев гимишдин медалдиз лайихлу хьана.
Ш.Мамедоваз турнирда “Виридалайни хъсан техника къалурунай” 50 агъзур манатдин кьадарда аваз махсус пишкешни гана.
Турнирдин эхиримжи юкъуз лагьайтIа, 86 кг-дин заланвал авайбурун арада Даурен Куругълиева Гран-При къазанмишун вирида вилив хуьзвай вакъиа тир. ГьикI хьи, финалдал къведалди адахъ галаз бягьсиниз экъечIай Славик Наниев (Кеферпатан Осетия-Алания) — 10:0, Мегьамедшериф Биякаев (Дагъустан) — 3:1, Хаби Хашпаков 11:0 (Кабардино-Балкария), ярумчух финалда Ада Багомедов (Дагъустан) 10:0 гьисабралди кумукьуни инанмишвал артухарзавай. Финалда ада дагъустанви Аманула Расуловахъ (ярумчух финалда адаз Америкадай тир викIегь спортсмен Захид Валенсия кумукьнавай) галаз вичин къуватар ахтармишна. Бягьс 6:0 гьисабдалди Дауренан хийирдиз акьалтIна. Шад жедай кар мадни ам я хьи, гила Д.Куругълиева “Ярыгинан турнирда” къизилдин 3-медаль къазанмишнава. И турнирдин гьасиррал ада вири санлай 7 медаль (10 акъажунра иштиракна) къазанмишуналди, Дагъустандин спортсменрин арада рекорд эцигнава.
Къуй чи ватандашар спортдин мадни гьуьндуьр дережайрин — дуьньядин ва Олимпидадин къугъунрин чемпионвилин тIварарин сагьибар хьурай!
Чи мухбир
