ЦIийи йисан 1-нумрада чна, “ЦIийи тIварар — цIийи тебрикар” лишандик кваз, алатай йисуз чпин намуслу зегьметдалди, чирвилералди, спортда ва маса хилера цIийи агалкьунар къазанмишай хейлин рухвайризни рушариз тебрикар рекье тунвай.
Гьелбетда, чавай вири баркаллу тIварар а чинал гъиз хьанвачир. ГьикI хьи, чи халкьдин къагьриман векилрин гьакъиндай вири указар ва я цIийи крарикай хабарар агакьзавач. Амма абурукай гилани, инлай кьулухъни чаз зенгералдини, чараралдини муштулухар гун давам жезва. Ихьтинбурукай сад чи меркез Махачкъалада авай, ДГУ-дин информатикадин ва информациядин технологийрин факультетдин декан, экономикадин илимрин кандидат, информациядин технологийринни экономикадин процессрин моделар туькIуьрунин кафедрадин доцент Заур Намединович Исмиханов я. Адаз алатай йисан сентябрдин вацра Россиядин Федерациядин образованидинни илимдин министрдин приказдалди “Россиядин Федерациядин образованидин хилен Гьуьрметлу работник” лагьай тIвар ва хурудал гьалддай знак ганва. Идан гьакъиндай чав хабар Мегьарамдхуьруьн райондин Советский хуьряй Зауран буба, юкьван школадин математикадин муаллим Намедин Сейфединович Исмиханова агакьарна. Гьелбетда, чна гьам бубадиз, гьам адан хциз къачунвай цIийи дережа рикIин сидкьидай мубаракзава.
Заур Намединович 1979-йисуз Советский хуьре дидедиз хьана. Ина юкьван школа, 2003-йисуз ДГУ-дин винидихъ тIвар кьунвай факультет яру дипломдалди акьалтIарна. 2009-йисуз Ростовдин экономикадин госуниверситетда илимрин кандидатвилин диссертация хвена. Адалай кьулухъ гьа вичи кIелай факультетда кIвалахзава.
Лагьана кIанда, Заур Намединовича гьар йисуз Россиядин гзаф шегьерра тешкилзавай илимдин жуьреба-жуьре олимпиадайра, конкурсра, килигунра иштиракзавай, гьар сефердани вичин еке чирвилер ва алакьунар раижзавай.
Адан гъиликай экономикадай, информациядин технологийрай, математикадай кхьенвай вишелай виниз илимдин кIвалахар хкатнава. Алимди Дагъустандин школьникар патал Яндекс компанияди кардик кутунвай “Яндексдин академиядин лицей” проектдиз къаюмвалзава, дагъвийрин аялриз цIийи технологийрин ажайиб сирер ачухариз чирзава. Гьа са вахтунда ам чи республикада РФ-дин Рособрнадзордин патай кьилин экспертни я.
Чна чи хциз алукьнавай ЦIийи йис ва къачунвай цIийи аршар мубаракзава:
МуьтIуьгъара генани
Илимдин аршар.
Агалкьунар хьурай вахъ
Гъетериз ухшар!..
Мерд Али Жалилов
