Чаз кхьизва
Зун “Лезги газет” фадлай кхьизвай, кIелзавай кас я. Гьар гьафтеда ам кIвализ хкизвай югъ за теспача кваз вилив хуьзва.
Зун паталди “Лезги газет” Кьиблепатан Дагъустанда кьиле физвай вакъиайрикай, гьерекатрикай, мярекатрикай хабар гузвай асул чешме я. Лагьана кIанда, газетди тек са лезги районриз талукь малуматар чапзавач, адан чинрилай чаз республикадин гьукумдин органрин кIвалахдикай, жуьреба-жуьре месэлаяр гьялун патал Дагъустандин кьилевайбуру кьабулзавай серенжемрикай, сиясатдикай, медениятдикай, тарихдикай, диндикай, эдебиятдикай, экономикадикай, спортдикай… кхьенвай макъалаяр кIелдай мумкинвал ава.
Эхиримжи йисара газетда “Чи бубайрин тарихдай”, “Лезги хуьрер”, “Куь ихтиярар”, “Зенд” ва цIийи маса рубрикаяр пайда хьун кIелзавайбуру хушдиз кьабулзава. ГьикI лагьайтIа, цIийивилери газет итижлу ийизва, вичел фикир желбзава.
“Лезги газет” республикадин жемиятдинни сиясатдин издание я. Ихьтин дережа хьуни газетдиз тематикадин сергьятар гегьеншардай ва гьа идалди гьар са нумра гъвечIи энциклопедиядиз элкъуьрдай мумкинвал гузва. Газетда багъманчидиз, муаллимдиз, духтурдиз, ашпаздиз, динэгьлидиз, экономистдиз, сиясатчидиз… герек малуматар хьун хъсан я, яни яшайишдин гьар са хилез талукь рубрикаяр хьуни ам девлетлу ийида.
Зи рикI алай ва еке гьевесдивди кIелзавай рубрикайрикай сад диндиз талукьди я (къейд ийин хьи, газетдиз акъатзавай диндин макъалаяр, за хьиз, заз чидай цIудралди маса агъсакъалрини кIелзава). Эхиримжи йисара и рубрика вичихъ диндин рекьяй еке чирвилер авай алим Ямин гьажи Мегьамедова кьиле тухузва. Адан сергьятра аваз чапзавай макъалайрин кьетIенвилерикай сад авторди вичин фикирар Къуръандин аятрин, гьадисрин, диндин машгьур алимрин зендерин куьмекдалди мягькемарун я. И делилди абур илимдин макъалайриз мукьва ийизва.
Мадни, “Лезги газет” себеб яз, 6000-далай гзаф ватанэгьлийрив мусурманрин диндикай делилар агакьзава, икьван чIавалди ван тахьай крарикай хабар жезва. Идалай гъейри, Исламдикай дуьз чирвилер хьуни акьалтзавай несилдин векилар жуьреба-жуьре “уьзуьррин” (экстремизмдин, терроризмдин) есирда гьатунивай хуьзва. Газетдиз акъатзавай макъалайри Исламдинни экстремизмдин арада са алакъани авачирди, мусурманрин дин анжах ислягьвилихъ эвер гузвайди тирди къалурзава. Тарихдай малум тирвал, Дагъустанда Ислам дин сифте яз кьабулайбур лезгияр я. Диндин алимрал гьалтайлани, чи халкь девлетлу я. Дагъларин уьлкведин имамрин муаллим, насигьатчи чи кьегьал ватанэгьли, шейх Ярагъ Мегьамед хьунал вири халкьди дамахзава.
Шукур хьурай Аллагьдиз, са вахтара хьиз, исятда диндихъ галаз алакъалу сергьятвилер авач. КапI ийиз, Къуръан кIелиз, Суннадал амал ийиз кIанзавайбуруз рехъ ачух я. И кардикай менфят къачуна, чун Аллагьдин рекьиз мукьва хьун лазим я. Къуй куь виридан рикIера — иман, кIвалера берекатар хьурай, играми ватанэгьлияр!
ГьакIни заз хайи чIалал акъатзавай газетдин ери хъсан, жемиятдин вири къатариз итижлу хьун патал зегьмет чIугвазвай, кьиле жегьил шаир, тешкилатчи авай редакциядин вири коллективдиз сагърай лугьуз кIанзава. Квехъ мадни еке агалкьунар хьурай.
Гьасен Балатов,
РД-дин Кьилин патав гвай
агъсакъалрин Советдин член
