Мадни агалкьунар хьурай! 

“Кьуд лагьай власть”, “виридалайни къадим кьвед лагьай пеше”, “къизилдин къелем” ва “тарихдин шагьидар” — ибур вири журналистрикай лугьузвай гафар я. Амай ма­сабуруз ухшар тушир, аламатдин  пешедин векилри — журналистри  и мукьвара  пеше­кар сувар къейдна. Пешедин сагьибри и югъ, адет яз, рикIик гьевес кваз гуьзлемишда. Дагъустандин журналистар патал им йисан вахтунда авур кIвалахдиз къимет гудай, нетижаяр кьадай вахт я. 

ИкI, Россиядин Печатдин йикъан вилик,  12-январдиз,  Махачкъаладин Урусрин театр­дин залда чIехи мярекат кьиле фена. Журналистар тебрикун патал иниз республикадин са жерге министерствойрин руководителар, Дагъустандин журналистрин Союздин председатель Али Камалов, общественникар, СМИ-рин векилар атанвай. Тебрикдин келимаяр гьакIни Россиядин информациядин “Российская газета”, “Интерфакс”, ТАСС агентствойрини агакьарна.

Мярекатдин сергьятра аваз печатдин ва сетевой са жерге  изданийриз гьуьрметдин гра­мотаяр ва лишанар, рикIел аламукьдай пиш­кешар гана. Кьилди къачуртIа, государст­во­дин­ жегьилрин политика кьилиз акъудунин карда информациядин жигьетдай куьмек гунай ва кIва­лахда сих алакъаяр хуьнай РД-дин же­гьил­рин крарай министрдин везифаяр тамамарзавай Камил Саидова Чухсагъул­дин чарни рикIел аламукьдай пишкеш  “Лезги  газетдиз” гана.

Мярекатдин сергьятра аваз Али Ка­ма­ло­ва чпи республикадин журналистикадин тарихда квахь тийидай гел тур са жерге журналистрив  ва я абурун (рагьметдиз фенвайбурун) мукьва-кьилийрив цIийиз арадал гъанвай “Легенда дагестанской журналистики”  тIвар тестикьарзавай дипломар вахкана.

Абурун арада хейлин йисара “Лезги газетдин” кьилин редактор яз кIвалахай чIехи  ватанперес, машгьур журналист, публицист  Агъариза  Узаирович  Саидовни  авай. Гьайиф хьи, ам 2018-йисан декабрдин вацра кечмиш хьана. Агъариза Саидов, гьакъикъат­дани Дагъустандин  журналистикадин риваят лагьай тIварцIиз лайихлу кас тир. Ада лезги публицистика вилик финик кутунвай пай кье­тIенди я. А.Саидов кьилин редактор тир девирдани, исятдани “Лезги газет” республикадин милли чIаларал акъатзавай газетрин арада, тираждин кьадардал гьалтайла, 1-чка­дал ала.

Алатай йисан конкурсрин нетижаяр

Россиядин Печатдин йикъан сувар къейд авунихъ галаз алакъалу яз  “Лезги газетдин”  редакциядини, адет хьанвайвал, алатай йисуз­ малумарнавай конкурсрин нетижаяр кьуна, гъалибчияр хкяна, цIийи йисан конкурсар тес­тикьарна.

Инал къейд ийин, виридалайни чIехи премияр чахъ кьвед ава — лезги халкьдин зурба векилрин, хайи  чIал хуьн патал еке пай кутур алимрин тIварарихъ галай абурукай чун сифтени-сифте рахада.

“Лезги  газетдин”  (а чIавуз — “ЦIийи дуьнья”) сад лагьай редактор, журналист, драматург, критик, латин графикадин бинедаллаз лезги ва табасаран чIаларин алфавит туькIуьрай алим, общественный  деятель Гьажибег Гьажибегован тIварунихъ галай  премия  — 10 000 манат —  милли журналистика, литература, илим вилик тухунин кардик лайихлу пай кутунай гузва.

2021-йисан нетижайралди ва газетдин редакцияди рейсадвилелди кьабулай къарардалди и премиядиз “Лезги газетдин” по­ли­тикадин отделдин редактор, РФ-дин журналистрин Союздин член, публицист, ша­ир, 32-далай виниз ктабрин автор  Нариман  Ибра­гьи­мов  лайихлу хьана. Газет кIел­за­вай­бу­руз марагълу, итижлу макъалайрин автор яз та­ниш тир Нариман Меликовича алатай ­йи­суз пуд ктаб гьазурна, чапдай акъуд­на: “Кьис­метдин къекъуьнрал” (роман), “Чи тIал-квал” (публицистика) ва “Алемдин чарх” (шии­рар). Жуьреба-жуьре жанрайрин ва месэлайринбур тир абуру  дидед чIалан,  лите­ра­­турадин библиотека мадни девлетлу авунва.

Лезгийрин  машгьур  лингвист, фило­логия­дин илимрин доктор, кавказовед, РАН-дин ДНЦ-дин ИЯЛИ-дин бине кутур алимрикай сад, чи халкь паталди вичин  метлеб садрани квахь тийидай  ва вичиз тешпигь авачир урус чIаланни  лезги чIалан таржумадинни баянрин  (переводно-толковый)  зурба словарь (35 агъзур гаф  ава)  багъишай  Мегьамед Гьажиеван  тIварунихъ галай  пре­мия  — 5000 манат —  лезги чIал хуьник, чируник, ахтармишуник, девлетлу авуник  пай  кутурбуруз гузва.

И сеферда премиядиз  Даггоспедуниверситетдин профессор, РФ-дин халкьдин прос­вещенидин отличник, РД-дин илимдин ла­йих­лу деятель, умуми образованидин “Да­гъус­тандин халкьарин культура ва адетар”  тарсар патал гьазурнавай республикада сад лагьайбур тир ва чпиз тешпигь авачир прог­раммаяр, учебникар ва илимдинни методикадин пособияр туькIуьрнавай алим, “Лезги газет” кIелзавайбуруз хъсандиз таниш автор Шайдабег  Мирзоев  лайихлу хьанва. Эдебдин, ахлакьдин, халкьдин милли культурадин, марифатдин месэлайрай ада кхьей ма­къалайри газет кIелзавайбурун итиж желбзава, хайи ивиррин чешмейрив дикъетдивди эгечIдай фикиррал гъизва.

Гуьгъуьнлай къвезвай конкурс алукьнавай гьар цIийи йисуз кьетIен фикир гун патал майдандиз акъудзавай месэлайрихъ галаз ала­къа­луди я. ИкI, алатай  2021-йис, РД-дин Кьил Сергей Меликован къарардалди,  ДАССР арадал атайдалай инихъ 100 йис та­мам хьунин юбилейдинди яз малумарнавай. Тарихдин вакъиаяр рикIел хуьн ва акьалтзавай несил ватанпересвилин руьгьдаллаз тербияламишун — “Лезги газетдин” пуд премия гузвай конкурс и месэлайриз талукьарнавай.

ИкI, 1-премия — 3000 манат —  тарихчи ва  по­литолог  Ханжан  Къурбановаз  гун кьетI­на­ва. ДагЦИК-дин председатель ВКП(б)-дин Дагъустандин обкомдин  Сад лагьай секретарь Нажмудин Самурскийди республикадин тарихда къугъвай ролдикай, ада кьиле тухвай зурба кIва­лах­рикай кхьенвай адан ма­къа­лаяр газет кIелзавайбуру итижлудаказ кьа­булна.

2-премия  — 2000 манат — редакциядихъ галаз сих алакъа хуьзвай чи амадаг, Хив райондин Цналрин хуьряй тир тарихдин муаллим  Рамазан  Велибеговаз  гудай къарар акъудна.

3-премиядиз  — 1000 манат — СтIал Сулейманан райондин Асалдхуьряй тир шаир ва журналист, “Лезги газетдин” амадагрикай сад  Абидин  Камилов  лайихлу хьанва.

“Хъсан шикил” ва “ИкIни жеда кьван!” конкурсар  (премия — 1000 манат) “ЛГ”-дин редакцияда кардик кваз гзаф йисар я. Гьайиф­ хьи, алатай йисан вахтунда “Хъсан шикил” конкурсдин шартIариз жаваб гудай шикилар чав агакьнач.

“ИкIни жеда кьван!” номинацияда  гъалибвал и сеферда  Хъартасви  Шагьвеледа­ лайихлудаказ къачуна. Адан къелемдикай хкатнавай  “Калин сарар”, “Калушар” кьисаяр  “ЛГ”-дин 27 ва 45-нумрайрай кIелиз жеда.

Алатай йисуз чна жегьил несилар, цIийи авторар хайи чIалал, литературадал ва публицистикадал желбунин, абурун арада бажарагълубур тайинарунин мураддалди  мад са шумуд конкурс малумарнай.

ИкI, редколлегиядин къарардалди,  “Гьевеслу ийидай премия” — 1000 манат ва диплом —  кьве касдиз гудайвал хьана.

ДГУ-дин филологиядин факультетдин журналистикадин отделенидин 3-курсунин студентка София Алирзаевадиз. СКФО-дин сергьятра журналистикадин хиле чирвилер къачузвай виридалайни хъсан пуд студентдикай сад тир ада милли газетдихъ галазни алакъа хуьзва.

Отставкада авай полковник, “Лезги газетдиз” жуьреба-жуьре месэлайрай мукьвал-мукьвал макъалаяр кхьизвай, вичин ери-бине СтIал Сулейманан райондин ЦIийи  Ма­кьарин хуьряй тир  Масуб  Магьмудоваз.

Жегьил несилар, кьилди къачуртIа, мектебра кIелзавай аялар ва студентар хайи чIалал ва литературадал желбунин, абурун арада бажарагълубур тайинарунин мураддалди чна  мад пуд конкурс малумарнай.

ИкI, сад лагьай конкурсдин — “Виридалайни хъсан гьикая” (3000 манат ва диплом) —  гъалибчи  “Фригърин цIирерикай”  сад — Хив райондин ЦIийи Фригърин мектебдин 9 “а” классда кIелзавай  Самира Мурсалова хьанва. Адан “Мергьяматлу кац” гьикая газетдин 52-нумрада чапнава.

Кьвед лагьай конкурсдин —  “Вирида­лайни хъсан очерк”  (2000 манат)  — гъалибчи ДГУ-дин филологиядин факультетдин журналистикадин отделенидин студентка  ­Камилла  Мегьдиханова  хьанва. Художник Байрамова Зилфидин яратмишунриз бахшнавай адан “Устаддихъ галаз гуьруьш” макъала-интервью 50-нумрадай кIелиз жеда.

Пуд лагьай конкурсда — “Виридалайни хъсан шиир” (1000 манат ва диплом) — гъалибвал “Фиригърин цIирерикай” мад са аялди —  Хив райондин ЦIийи Фиригърин мектебдин 9-классда кIелзавай Аскер Бегова, адан шиирралди кхьенвай “Имуча-мучайри”  къачунва.

Дуьшуьшдикай мумкинвал къачуна,  аялрихъ галаз кIвалах тухузвай, акьалтзавай не­сил хайи чIалан чимивилел, къешенгвилел,  идахъ галаз сад хьиз, милли газетдихъ­ га­лаз­­ алакъаяр хуьнал желбзавай ЦIийи Фиригърин мектебдин лезги чIалан муаллим  Абдул  Ашурагъаеван  зегьметни заз кье­тIен­даказ  къейд ийиз, адаз чухсагъул малумариз кIанзава.

Алатай йисуз чна мад са конкурс  — “Йисан мухбир” — малумарнай.  Премия — 3000 манат. Редакциядин рейсад тир къарардалди ва газет кIелзавайбурун патай атай баянрин, къейдерин бинедаллаз, и премия  “Лезги газетдин” Мегьарамдхуьруьн районда авай хсуси корреспондент,  бажарагълу журналист Абдулафис Исмаиловаз гудайвал хьана.  Жемятдин тIал алай месэлайрикай ачухдаказ  ва дериндай кхьизвай адан макъа­лаяр газет кIелзавайбуру хушдаказ кьабулзава.

Конкурсра гъалиб хьанвай юлдашриз ре­дакциядин коллективди агалкьунар рикIин сидкьидай тебрикзава. Премиярни дипломар, редакциядиз атана, вахчуз жеда.

Жасмина Саидова