РД-дин Кьил Сергей Меликован къарардалди, алукьнавай 2022-йис Дагъустанда “Образованидин йис” яз малумарнава. “Республикадин образованидин хиле кьиле тухузвай государстводин политикадин асул месэлайрикай сад, виликдай хьиз, агьалийриз образование къачудай ихтияр таъминарун яз ама. Гьа са вахтунда, и образование виниз тир еридинди, ам гунал машгъул идараяр ла­гьайтIа, вири агьалийрин тIем акакьдайбур  хьана кIанда”, — гьисабзава региондин Кьили­.

Хуьрера, районра, арандани дагълара  акьалт­завай несилдиз ерилу образование къачудай мумкинвал таъминарун, мектебар акьал­­тIарнавай жегьилриз  чирвилер къачун давамарун патал шартIар тешкилун ва икI мад — и месэлайрал кьетIен фикир желбдайвал я.

Талукь яз, “Лезги газетдин” конкурсни ви­нидихъ лагьанвай месэлайрихъ галаз алакъалу я. Пуд чкадикай ибарат тир и конкурсдин премийрин кьадар виликдай хьиз амукьда: 3000 манат — виридалайни хъсан очеркдай, 2000 манат — публицистикадин макъаладай ва  1000 манат — лап хъсан  шиирдай. Текстинин кьадар 4 чарчелай артух ва шииррин кьадар 5 бендинилай тIимил тахьун лазим я.

Алатай йисара хьиз, чна юмординни сатирадин куьруь жанрайрин “ИкIни жеда кьван” ва уьмуьрдин рехнеяр арадай акъудиз куьмек гузвай “Хъсан шикил” конкурсарни дава­марзава. И конкурсра гъалиб хьайибуруз гьардаз 1000 манат  премия ва дипломар  гуда.

“Гьевесламишдай премия” — 1000 манат ва диплом —  са шумуд касдивай къачуз же­да. И кар патал хайи газетдин чинал жуьре­ба-жуьре хци месэлайрай кьил-кьилел алай  макъалаяр гъана кIанда.

Идалайни гъейри, литературадихъ, чIа­лан къешенгвилихъ галаз алакъалу жаванрин ва жегьилрин арада бажарагълубур хкя­гъунин  мураддалди малумарнавай пуд премияни къуватда ама.

Сад лагьайди — виридалайни хъсан гьикаядин эсер (кьадар вини кьил пуд чарчелай артух тушиз, А4 форматдин чар, 14 кегль, 1,5 интервал). И конкурсда чпин яшар 35 йисалай виниз туширбурувай иштиракиз жеда.

Кьвед лагьайди — Дагъустандин вузрани колледжра кIелзавай лезги студентрин арада “Виридалайни хъсан очерк” кхьинай (кьадар вини кьил пуд чарчелай артух тушиз, А4 форматдин чар, 14 кегль, 1,5 интервал). Тема ачухди я.

Пуд лагьайди — мектебра кIелзавай  аялрин арада “Виридалайни хъсан шиир” кхьинай. Тема ачухди я.

Конкурсрин гъалибчийрин агалкьунар пулдин премийралди (1-чка — 3000 манат,     2-чка — 2000 манат ва 3-чка — 1000 манат)      ва “Лезги газетдин” дипломралди лишанла­мишда.

“Йисан мухбир” конкурс —  3000 манат. “Лезги газетдихъ” галаз алакъаяр хуьзвай ватанэгьлияр патал им лап хъсан мумкинвал я, гьикI лагьайтIа, макъалайрин я темаяр, я жанраяр сергьятламишнавач. Куь патай герекди активнидаказ алакъа хуьн, газет­дин редакциядиз мукьвал-мукьвал макъа­лаяр рекье тун, лезги жемятдин тIал алай месэлаяр къарагъарун  я.

Конкурсдиз ракъурзавай макъалаяр басма авунвай кьуд чарчелай чIехибур хьун ла­зим туш. Макъалайрин кьилел гьи конкурс фикирда кьуна  кхьенвайди ятIа къейд авун чарасуз я!  Конкурсдин шартIариз жаваб тагузвай  эсерар гьисаба кьадач.

Милли журналистика, хайи чIал хуьник кье­тIен пай кутурбур, газетдихъ галаз сих ала­къа хвейибур, разивилерни, наразивилерни малумарайбур, метлеблу, маналу макъалаяр кхьейбур,  лезги эдебиятдин ва марифатдин рекье камар къачурбур — куь къелемар гьамиша хци яз амукьрай, уьмуьрда  агалкьунар хьурай!

«Лезги газет»