Кьилди къачуртIа, уьлкведин регьберди гьукумдин талукь органрин вилик Кеферпатан Кавказдин республикадин вири хуьрер газдалди таъминарунин жигьетдай кардик квай проектар, энгел тавуна, вахтунда кьилиз акъудунин ва энергетикадин майишат цIийи хъувун, вилик тухун патал алава инвестицияр желб авунин месэлаяр эцигнава.
“Чалай Урусатдин энергетикадин ва федеральный дережадин са жерге тешкилатрихъ галаз хъсан алакъаяр тешкилиз алакьнава. Гила, Президентдин тапшуругъар себеб яз, алакъаяр мадни сихбур жеда. Куьмек гунай, россиявийрин тIалубунрив датIана къайгъударвилелди эгечIунай заз Владимир Владимировичаз сагърай лугьуз кIанзава.
Кьилди са региондин агьалияр газдалди ва электричестводалди таъминарунин макьсаддалди федеральный дережада аваз серенжемар кьабулай маса дуьшуьш малум туш. Вилик гзаф кIвалахар квайди, абур кьилиз акъудун патал гьукумдин органрин, са жерге маса тешкилатрин куьмек герек къведайди ва дагъустанвийри сабурлувал хуьн герек тирди рикIелай алудна виже къведач”, — къейдна РД-дин Кьил Сергей Меликова, Президентди ганвай тапшуругърин гьакъиндай вичин фикирар лугьудайла.
«Лезги газет»
