Кьурагь райондин Гелхенрин хуьряй тир Абдулгьамид Гьасанович Эмиргьамзаев Ульяновский областдин губернатордин заместителвиле тайинарнава. Идакай областдин официальный сайтда чапнавай малуматдай хабар хьана.
Чешмедин делилралди, А.Эмиргьамзаева исполнительный гьукумдин федеральный органрихъ галаз алакъаяр хуьнин жигьетдай кIвалах тухуда.
Чи ватанэгьли вичин заместителвиле тайинаруниз баянар гудайла, Ульяновский областдин губернатор Алексей Русскихди къейдна: “Чун фадлай танишбур я, Госдумада санал са комитетда кIвалахна. Адан чирвилери ва мумкинвилери региондиз агьалияр патал важиблу проектар кьилиз акъудиз куьмекда…”.
А.Эмиргьамзаеван 57 йис я. Ада ДГПИ, дуьньядин экономикадин ва международный алакъайрин институтда аспирантура акьалтIарна.
Дзюдодай ва самбодай СССР-дин спортдин мастер, Вирисоюздин са жерге акъажунрин гъалибчи я. Жуьреба-жуьре йисара Дагъустандани Москвада карчивилел машгъул хьана. 2016-2021-йисара Государстводин Думадин VII созывдин депутат тир.
Агьмед Магьмудов
