18-декабрдиз Шихидхуьруьн юкьван школада анин педколлектив ва кIелзавай аялар патал шад вакъиа кьиле фена: 40 йисалай виниз и мектебда лезги чIаланни литературадин тарсар гайи, гьа са вахтунда школадин завучвал, тешкилатчивилин кIвалахдин рекьяй директордин заместителвилин жавабдар къуллугъарни кьиле тухвай бажарагълу муаллим, писатель Нажмудин Кьадиевич Шихнабиев ял ягъиз шад гьалара рекье туниз талукьарнавай мярекат кьиле фена.
Мярекат, атанвай багьа мугьманар тебрик авуналди, школадин директор Раида Айдаевади ачухна ва гаф межлис кьиле тухузвайди тир муаллим Румина Муслимовадиз гана. Ада муаллим, писатель Нажмудин Шихнабиеван уьмуьрдикай ва яратмишунрикай куьрелди суьгьбет авуна ва адаз и мярекатдин вилик “Куьредин ярар” культурадин маканда чапдай акъуднавай адан шииррин “Зун рикI я…” цIийи ктабни мубаракна, школада ада гзаф йисара авур намуслу кIвалахдай чухсагъул лагьана.
Анал хуш келимаяр Ибрагьим Камилова, Сажидин Саидгьасанова, Къурбансмяли Пирвелиева, директор Раида Айдаевади, “Дагъустандин дишегьли” журналдин редактор Наира Шихнабиевади, и цIарарин авторди ва масабуру лагьана.
Эхирдай Нажмудин Шихнабиева ихьтин мярекат тешкилунай ва тебрикдин гафарай школадин руководстводиз, муаллимриз, аялриз, гьакIни вичин тIварцIелди яргъарай атанвай багьа мугьманриз — къелемдин стхайризни чухсагъул лагьана.
Абидин Камилов
