Эхиримжи йисара Москва ва Санкт-Петербург шегьерра кардик квай “Просвещение” чапханади 1-4-классар патал “Лезги чIал” ва “Литературадай кIелун” пособияр акъудна. Ктабар А.А.Тахо-Годидин тIварунихъ галай илимдинни ахтармишунрин институтдин къуллугъчийри 2015-йисуз лезги чIалаз ва литературадай кIелуниз талукь сифтегьан умуми образованидин рекьяй кьвед лагьай несилдин федеральный образовательный стандартрин (ФГОС) чешнелу программадин бинедаллаз туькIуьрна. 2018/2019-йисара абур хуьрера ва шегьерра кIелзавай аялрал агакьна ва ктабрай чирвилер къачузва.
Ктабрин кьадар гьам хуьрерин, гьам шегьеррин мектебра лап тIимил хьуниз килигна, 2021-йисуз “Просвещение” издательстводи алава яз ахкъуд хъувуна ва аялрал агакьарна.
Декабрдин вацра чал шад жедай мад са хабар агакьна: чи школайриз юкьван классрин учебный пособияр, яни 5-классдин “Лезги чIал” (авторар — Н.Ш.Абдулмуталибов ва К.Н.Ферзалиев) ва “Лезги литература” (авторар — Къ.Х.Акимов ва С.Къ.Акимова ) пособияр агакьнава. Ктабрин кьадар лагьайтIа, “Лезги чIал” — 4633 экземпляр, “Лезги литература” 2030 экземпляр я. Ктабар, кIелзавай аялриз килигайла, тIимил ава, абур аялриз бес жедач. Ктабрин кьадар районрин ва шегьеррин образованидин управленийри илимдин ва образованидин Министерстводиз вахкузвай школайра кIелзавай аялрин кьадардиз талукь делилриз килигна тайинарзавайди я.
Идалай вилик 6-7 ва 8-9, 10-11-классар патал лезги чIалан ктабар са жилдера аваз акъуднавай. Гила абур кьилди-кьилди акъуддай къарар кьабулнава.
Алай вахтунда А.А.Тахо-Годидин тIварунихъ галай илимдинни ахтармишунрин институтдин къуллугъчийри 6-9-классар патал Москва ва Санкт-Петербург шегьерра кардик квай “Просвещение” чапханадиз ктабрин материалар рекье тунва. Абурни 2022-йисан эхирра аялрин гъилера хьуник умуд кутазва.
Виликан йисарив гекъигайла, гьар са классда хайи чIалаз ганвай сятерин кьадар тIимил жезва. ТIимил хьунин месэлани асул гьисабдай мектебрин директоррилай аслу я. Вучиз лагьайтIа, бязи директорри мектебдин компонентдай лезги чIалазни литературадиз сятер чара ийизвач. Нетижада, гьайиф хьи, йисалай-суз сятерин кьадар тIимил жезва.
Жаклина Мейланова,
Педагогикадин институтдин
илимдин къуллугъчи
