ХъуьтIуьн фестиваль
Республикадин жегьилрин центрада Россиядин школьникрин гьерекатдин хъуьтIуьн фестиваль кьиле фена. Ам Вирироссиядин жемиятдинни государстводин аялринни жаванрин “Россиядин школьникрин гьерекат” организациядин Дагъустандин региональный отделенидихъ галаз санал кьиле тухвана. Адан кIвалахда республикадин, Вирироссиядин акцийрин, конкурсрин ва проектрин активистри ва жуьреба-жуьре конкурсрин гъалибчийри иштиракна.
Вилик жергейра ава
Дагъустандин госуниверситетди алатай йисуз кьиле тухвай илимдинни ахтармишунрин кIвалахриз къимет гудай мярекат кьиле тухвана.
Лугьун лазим я хьи, университетда йисан вахтунда жегьил алимри международный, Вирироссиядин илимрин конференцийра, жегьилрин форумра иштиракна. Университетдин жегьил алимрин 25 программа “Россиядин инновациядин лап хъсан программаяр” сиягьдик акатна. Идалайни гъейри, ДГУ-дин алимри международный ва Вирироссиядин дережадин метлеб авай илимдин форумра иштиракна ва анрал ингилис чIалал докладар авуна.
“Чи университетда тухузвай илимдин кIвалах пара важиблуди я. Чаз гьар са камуна илимдал рикIивай машгъул жегьилар герек я. Иллаки международный ва Вирироссиядин илимдин мярекатра иштиракзавай жегьилар университетда хьун чун патал важиблу я. Алукьнавай йис патал чи вилик мадни еке везифаяр акъвазнава. Абур кьилиз акъудун патал заз чи вири алимрихъ, преподавателрихъ, студентрихъ хъсан сагъламвал, кIелунра, илимда агалкьунар хьана кIанзава”, — лагьана ДГУ- дин ректор Муртазали Рабаданова.
ДГУ-дин илимдин ва инновацийрин рекьяй проректор Назир Ашурбегова университетдин илимдиз талукь жуьреба-жуьре программайрикай лагьана. ДГУ-да жегьил алимри регьбервал гузвай илимдин лабораторияр ава. Абуру чеб алай чка тайин краралди къалурзава.
— Чи университетдин виридалайни лайихлу кар ам я хьи, ина илимдин, ахтармишунардай дуствилин бажарагълу десте арадал атанва. Чи университетдин алай аямдин хилерикай сад жегьил алимриз чпин ахтармишунар кьиле тухудай вири шартIар тешкилун я, — лагьана Н.Ашурбегова.
Университетдин гьахъ-гьисабдихъ галаз (цифрайрихъ галаз) алакъалу хилекай Бадрудин Мегьамедова ихтилатна. Ада къейд авурвал, къенин юкъуз цифровизация галукь тавунвай са хелни авач. ДГУ-да и жигьетдай мукьуфдивди кIвалахзавай са шумуд десте ава. Абурухъ Россиядин ва гьакI международный майдандиз экъечIдай мумкинвилер, алакьунарни ава.
Гъалибчийрин тIварар
РД-дин жегьилрин крарин рекьяй министерстводи жегьилрин сиясатдин хиляй кьиле тухвай конкурсдин нетижаяр кьуна. Абур ватанпересвилин, наркоманиядиз акси кIвалах тухуниз ва гуьгьуьллубурун гьерекатриз талукьарнавайбур тир. Конкурсдин нетижаяр кьурла, агъадихъ галай гъалибчияр малум хьана:
“РикIел хуьн” проектдай — Салигьат Мегьамедова, “Кас авачир лув гудай аппаратдин куьмекдалди инсанар жагъурун” проектдай — Даниял Османов, “Международный гуьгьуьллубур — кардик” проектдай — Каринэ Саакян, “Чна уьмуьр хкязава” проектдай — Абдулгьаким Ражабов, “КукIушдал фидай рехъ” проектдай — Алигьажи Мегьамедов.
Лап хъсанди
М.Межидован тIварунихъ галай пешекарвилинни педагогвилин колледжди “Вирироссиядин образованидин организациядин лап хъсан сайт” конкурсда гъалибвал къазанмишна. Колледждин талукь сайтдин администратор Наталья Бондаренко ва директор Салигьат Адзиева кьвед лагьай дережадин дипломралди къейдна.
Дагъустандин образованидин ва илимдин министерстводин пресс-къуллугъди хабар гайивал, Вирироссиядин ачух конкурсдин тешкилатчи РагъакIидай патан Сибирдин пешекарвилин чирвилер гудай центр тир. И конкурсда образованидин идарайрин сайтрин гзаф кьадар администраторри ва руководителри иштиракна.
Конкурсда сайтда эцигзавай материалрин алай йикъан метлебдиз, хийирлувилиз, агьалияр желб авуниз, материалрин савадлувилиз, ишлемишунин къулайвилиз килигна къимет гузвай. И жигьетдай М.Межидован тIварунихъ галай пешекарвилинни педагогвилин колледждин сайт хъсанбурун жергедик акатна.
«Лезги газет»
