Дуьньядин вири халкьари еке умудар кутур Лацу Металлдин Яцран йисни алатна. Инсаниятди сифте нубатда коронавирус лугьудай тIугъвалдикай азад жеда, алимри адаз акси дарман жагъурда лагьана фикирнавай. Дарманарни акъудна, агьалийри рапарни язава, амма тIугъвал квахьзавач. Адан цIийи штаммар пайда жезва. Дуьнья­да 280 миллиондилай гзаф инсанар начагъ хьанва.

Кьейибурун кьадар 5,5 миллиондиз барабар я. “Омикрон” штамм майдандиз акъатунихъ галаз ала­къалу яз гзаф уьлквейри мад сергьятар кIевирзава, къадагъаяр эцигзава. Са гафуналди, халкьар тIугъвалдикай икрагь хьанва. Ада са­ки вири уьлквейрин экономикадиз ри­кIе­лай тефидай хьтин зиянар гузва. Гьатта сиясатдин месэлайризни чIуру патахъай таъсирзава.

Кьвед лагьайди, халкьари, тIугъвал­дихъ галаз женгиниз экъечIайла, сиясатдин, военный къизгъинвилер яваш же­дайдак умуд кутунвай. Гьайиф хьи, вири  терсеба патахъ элкъвена. Фашизмдин, нацизмдин пайдах хкаж хъувунвай Украина себеб яз, дуьньядин зурба кьве уьлкведин — Россиядин ва США-дин сиясатдин, эконо­микадин, амадагвилин ала­къаяр лап чIуру терефдихъ элкъвенва. США-ди Украинадиз яракьар маса гузва. Аниз военный пешекарар рекье твазва. США-дин военный гимийри ЧIулав гьуьле сирнавзава, Россиядал мадни санкцияр илитIда лугьуз малумарзава. США-дин гъилибанар тир РагъакIидай патан са бязи уьлквейрини, Евросоюздини, ОБСЕ-дини лепI­ляпIар­зава, Россиядиз акси чIуру рехъ кьунва. Россияди гуя Украинадал вегьезва, ана госпереворот ийизва лугьудай ванер акъудна, США-диз мадни Россиядиз акси сиясат тухудай рехъ ачухна.

Эхирни РФ-дин Президент В.Путина США-диз хатасузвал хуьнин гьакъиндай теклифар гана, США-дин президентни, НАТО-дин генераларни фикирлу хьанва. Путинан вил абурун жавабдал ала. 23-де­кабрдиз кьиле фейи пресс-конференциядални журналистрин суалриз жавабар гудайла, Владимир Путина мад сеферда тикрарна: США-ди, НАТО-ди къанни цIуд йис идалай вилик еке хиве кьунар аву­найтIани, абурал амалнач, НАТО-дин сергьятар гегьеншарна, къе адан аскерар яракьар, 30 уьлкведа ава ва абуру Россия элкъуьрна кьунва. Артухлама Урусатдин чилер тир Украинани чпин гъилик авунва. Украинви фашистрин гъилеларди дяведик цIай кутаз ва ахпа Россия тахсирлу ийиз кIанзава. Чна ихьтин амалриз рехъ гудач. Ислягьвал, Россия­дин хатасузвал хуьн патал США-диз рекье тунвай истемишунриз гьакIан буш гафаралди (президентрин, политикрин, НАТО-дин генералрин, кьуру гафарикай, тапаррикай икрагь хьанва)  ваъ, гьакъи­къи краралди жаваб гун лазим я.

Лацу Металлдин Яцран йисан эвездиз Вили Цин Пеленг атанва. Вуч гваз? Ада инсаниятдиз вуч гъида? Виридаз малум тирвал,  Пеленг терс къилихрин  викIегь гьайван я. Гьа са вахтунда адаз кичI чидач. Пеленгдиз цIийивилер, гьар вуч хьайитIани чириз кIанда. Пеленгдин лишандин къаюмвилик акатзавай йис гурлу вакъиайралди, фикирда авачир хьтин дегишвилералди тафаватлу жедалда. ГьикI лагьайтIа, РагъэкъечIдай ­па­та вили ранг даимвал, гьамишанвал авачирбурукай сад яз гьисабзава. Гьавиляй гьар сад — инсанарни, уьлквеярни рикIел алачир дегишвилер кьабулиз гьазур хьана кIанда. Пеленг датIана гьерекатда авай гьайван я. Гьавиляй датIана са квехъ ятIани калтугзавайбур, дегишвилерихъай къурху авачирбур, уьмуьрда активвал къалурзавайбур балкIан­дал­ни жеда. Китайдин астрологри гьисабзавайвал, Цин Пеленгдиз къастунал кIеви, зегьметдал рикI алай инсанар кIанда. Эгер касди вичин вилик рикIин мурад тамамардай къаст эцигна­ватIа, 2022-йисуз ам кьилизни акъатда.

Пеленгдин паталай астрологри инсанрик еке умудар кутазва. Мурадар кьилиз акъатуналди. Уьмуьрда, кIвалахда хъсан патахъ дегишвилер хьуналди. Са къурхулувални авачиз, яшамиш жезвай чкани, пешени, кIвалахни, дегишариз жедалда. ВикIегьвал, активвал къалурзавай инсанар патал Пеленгдин йис бегьерлуди, гъалибвилеринди жедайдини тестикьар­зава.

Карчивилел, бизнесдал машгъулбуруз кьилди ваъ, амадагар (партнерар) галаз санал кIвалахун теклифзава. Ихьтин къайдада крар тешкилайтIа, гъиле кьазвай лап четин кIвалахарни  бегьемариз жедалда.

Сагъламвиликай  рахайтIа, Пеленгдин йиса чун гзаф азаррикай хуьдалда. Анжах тагькимарзава: сагълам уьмуьр тухун, менфятлу, ерилу ва кьадар чиз хуьрекар тIуьн, йикъан хсуси къайдадал ­(режимдал) кIевелай амал авун. ИкI эге­чIай­тIа жував, жуван сагъламвилив, вири хъсан хьун лазим я.

Астрологри мадни са теклиф гузва: мурадар кьилиз акъатна кIанзаватIа, Пеленгдин гьакалдикай менфят къачун. Ам рангунин къиметлу металлдикай авуртIа хъсан я. Шуьшедикай, гьамгадикайни Пеленгдин кIалуб, суьрет туькIуьрна, пар-тал­дик кутаз, гарданда тваз жеда. Са кар мад рикIел хуьн тIалабзава, Пеленгдиз вичихъ галаз акъажунардайбур (соперникар) кIандайди туш. Эгер кIвале жуваз алатай йисариз талукь гьакалар, запабар аматIа, абурукай азад хьун хъсан я.

Дуьньядин майданда кьиле фидай зурба ва важиблу вакъиайрикай рахайтIа, обществода къизгъинвилин гьалар артух жезва. Лугьузвайвал, США-дин ва Россиядин арада “къайи дяве” давам жеда. Ихьтин гьалдиз РагъакIидай патан бязи уьлквейрини къуват гуда. Иниз килигна, Россия гьар са терефда вичин артуханвал, пайгарвал, мягькемариз алахъда.

Гьа са вахтунда США-да сиясатдин  къенепатан кризисди республиканский ва демократрин партийрин арада физвай акъажунар мадни къизгъинарда. Нубатдин сечкийрин вилик ва сечкийрилай  гуьгъуьнизни партийрин гьуьжетдик экечIай халкь кIеве гьатда. Доллардин къимет агъуз аватун мумкин я. Международный инвесторри чпин пулар маса уьлквейрин банкара эцигда. Америкада садрани тахьай хьтин инфляция — 15 процентдин — арадал къведа. Идаз макроэкономикадин ва зегьметдин базардин (рынок труда) гьалари таъсирда. ТIугъвалдихъ галаз ала­къалу яз карханайри, майишатри, фирмайри кIвалахдай инсанрин патахъай­ кьитвал гьиссда.

Китайди халкьдин майишатдин вири хилерай виликди финин, сиясатдин рекьяй вилик  экечIунин гьерекат мадни давамарда. Ида США-дин регьберрик, политикрик квай ажугъ артухарда. Индияни дуьньядин майданда вичин къуват, къудрат хкажиз алахъда. Ада Персид­ский заливдин къерехрив гвай араб ­уьлквейрихъ галаз амадагвилин, дуствилин алакъаяр мягькемарда. Ихьтин ала­къайри кьве терефдизни хийир гуда.­ ­Индиядив алава хаммал, суьрсет агакьда, инфраструктура ва хуьруьн майишат ­вилик тухудай мумкинвал жеда. Араб уьлквейрив алай аямдин технологияр агакьда.

Военный промышленностда, медицинада менфятлу цIийивилер арадал къведа. Лугьузвайвал, 2022-йисуз медицинада майдандиз акъуддай цIийи дарманри инсандин уьмуьр 20-25 йисан гзафардай мумкинвал гуда. Гьа са вахтунда алимри инсанар рикIин, мефтIедин азаррикай хуьдай, къутармишдай дарманар гьазурда. Амма тIугъвалдиз, гила дуьньяда гегьеншдиз чкIизвай «омикрон» штаммдиз  талукь яз аяндарривай, астрологривай ва алимривайни тамам жавабар гуз жезвач. Исятда вири халкьарин къайгъу, тIал, абуру гузвай суал сад я: коронавирусдин, къадагъайрин эхир мус жеда. И суалдиз викIегьдиз жаваб гудай кас авач. Коллективный иммунитет арадал гъайила, ам квахьда лугьузватIани? Виридалайни чIуруди коронавирусдин штаммар пайда хьун я. Абурун вилик пад гьеле кьаз жезвач.

Санлай къачурла, Россиядин экономикадиз тIугъвалдивай са артух зиян гуз хьаначтIани (ВВП-дин кьадар 4,6 про­центдин хкаж хьана), инфляциядикай акI ­лугьуз жедач. Ам 8,1 процентдин виниз акъат­на. ГьикI лагьайтIа, уьлкведа вири шейэрин къиметар садлагьана хкаж хьана. Эгер 2020-йисуз 4,0 процентдин тиртIа, гила — 8-9 процентдин. И татугайвал мадни давам жезва. Пеленгдин  йисуз шейэрин къиметар хкаж хьунин вилик пад кьун кьилин месэладиз элкъведа. ГьикI ла-гьай­тIа, дуьньядин майданда шейэрин къи­метар 25-31 процентдин хкаж жедалда. ЯтIани Россиядин экономистар и гьаларай уьлкве лайихлувилелди экъечI-дайдахъ агъунва. И  кар патал Россиядихъ ишлемиш тийизвай хейлин мумкинвилер, такьатар ава.

Девлетлуярни кесибар, жегьиларни яшлубур, пешекарарни фялеяр, азад базарни государстводин экономика, инфляцияни дефляция сад-садаз акси яз экъе­чIуни инкъилабдин гьерекатарни арадал гъун мумкин я. Аяндарри инкъилаб инкар­завачтIани, акьван къурху акатун герек авачалда. Дуьньядин уьлквейра адан вилик пад кьадай регьберар, политикар, мумкинвилер ава.

Гьуьрметлу кIелзавайбур, ватанэгьлияр! Квез алукьнавай Пеленгдин йис мубаракрай! Къуй ам чазни, вири инсаниятдизни ислягьди, сагъламди, берекатлуди, руьгь шадардайди, гьар са хиле агалкьун­ринди хьурай.

Нариман Ибрагьимов