Дагъустан Республикадин Кьил Сергей Меликова Республикадин Кьилин 2021-йисан грантрин конкурсдин гъалибчийрив сертификатар вахкана. И шадвилин мярекат Махачкъаладин Шииратдин театрда кьиле фена.
Алай йисуз РД-дин Кьилин грантрин рекьяй Советдин къарардалди грант гун патал 65 проект хкяна (санлай 26 миллион манатдин кьадарда).
Грантар республикадин илим, образование, экономика, культура ва искусство, жегьилрин политика, физкультура ва спорт, общественный кIвалах, СМИ-яр, гъвечIи карчивал ва маса месэлаяр патал тайинарнавай.
Тебрикдин рахунра региондин Кьили къейд авурвал, конкурсдин гъалибчияр — чи къенин югъ ва Ватандин пакадин югъ, чи дамах, чи умуд, мадни виликди финин заминвал я.
Важиблуди а кар я хьи, йисалай-суз конкурсда иштиракзавай номинантрин кьадар артух жезва. Чпини жуьреба-жуьре терефрай, гьакьван фикир желбдай ва хийирлу рекьерай теклифар вилик эцигзава. Ихьтин мумкинвал авайла, чаз, гьакъикъатдани виридалайни хъсан алакьунар авайбур хкядай шартIар арадал гъизва. Илимдин, ахтармишунрин, цIийи затIар арадал гъунин жигьетдай иштиракзавай ксарин агалкьунар гьихьтинбур ятIа, ачухдаказ чир жезва.
“Алай йисуз конкурсда 352 проект вилик гъанвай. Гъалибчийрин арада, шегьеррин хьиз, районрин муниципалитетрин, векиларни ава”, — лагьана Сергей Меликова.
Ада къейд авурвал, алатнавай йисуз виридалайни еке конкурсар образованидин, илимдин, техникадин ва инновацийрин рекьерай хьана. Санлай 250 проект 24 грант патал гана. (9 проект — 1 грант патал). И жигьетдай региондин Кьили инал къалурнавай грантрин кьадар артухарун теклифна.
“Икьван еке, викIегь соискателрин иштираквили а кардикай лугьузва хьи, чи республикада илимдинни техникадин, образованидинни инновацийрин жигьетдай чун хейлин вини дережада ава. И кар инлай кьулухъни виликди тухвана кIанда”, — къейдна республикадин Кьили.
Кьилдин кIвалахрин жергедай Сергей Меликова Эльдар Хусаинован “Учитель года — 2019” конкурсдин гъалибчидин проект хъсанди яз къейдна. Адан асул метлеб школьникриз географиядай гузвай чирвилерин дережа хкажун я. Вични — чирвилер гунин видеороликрин куьмекдалди. Проект, — къейдна региондин Кьили, — география чирунин программадин бине хьун мумкин я.
Ада гьакIни Россиядин Игит Абдулмалик Мегьамедоваз талукьарна гьазурнавай “Адан викIегьвал ва Игитвал рикIелай алудун лазим туш” проектдин авторризни сагърай лагьана.
Субъектдин руководителди алава хъувурвал, грантри къалурзавайвал, алатнавай 10 йисара дагъустанвийри чеб пешекарвилин жигьетдай вини дережайрихъ агакьарайвал, гилани давамарзава. И вири нетижаяр фикирда кьуна, республикадин илимдин сообществодин, жегьилрин сиясатдин ва маса тешкилатрин теклифарни фикирда кьуна, Дагъустан Республикадин Кьилин грантрин фонд саки кьве сеферда артухарнава.
Инлай кьулухъни гьукуматдин патай вири хъсан крариз куьмек гунин къайда мадни хъсанардайвал я.
«Лезги газет»
