Терроризмдиз — ваъ!
Ахцегь райондин Хуьруьгрин хуьруьн просвещенидин “Люминари” центрада “Терроризмдиз — ваъ!”, “Ахцегь райондин жегьилар терроризмдиз акси я!” лишандик кваз жегьилрин форум кьиле фена.
Райондин дишегьлийрин советдин председатель Таира Мегьарамовади майдандиз Ахцегьрин 1-нумрадин школадин жегьилриз теклифна. Абуру Россиядин Игит Мегьамед Нурбагандовакай къалурай сегьне ва 1999-йисуз Дагъустандиз сухулмиш хьайи Хаттабанни Басаеван кIеретIрин хура дагъвияр викIегьвилелди акъвазайвилин хроникадин материалар къалурна.
Мугьманар ва форумдин иштиракчияр тебрикуналди, райондин общественный палатадин председатель Али Исмаилова къейд авурвал, терроризмдин вилик пад кьуниз талукьарнавай и мярекат важиблуди я. Райондин кьилиз Осман Абдулкеримов атайдалай кьулухъ общественный палатадин, жегьилрин парламентдин, агъсакъалрин ва ветеранрин советрин тешкилатрин кIвалах аквадайвал активламиш хьанва. Къенин форумни чна райондин руководстводин куьмекдалди кьиле тухузва.
Гаф РД-дин Кьилин куьмекчи, Кьиблепатан Дагъустанда Республикадин АТК-дин аппаратдин векил-куратор Тимур Зербалиева къачузва.
— Террордин нетижада са тахсирни квачир аялар, дишегьлияр, яшлубур зулумдик-азиятдик акатзава. И жигьетдай Дагъустанда гьалар гуьзчивилик кватIани, секин я лугьуз жедач. ЦIи Махачкъала шегьердин, Дербент ва Хасавюрт районрин сергьятра террориствилин чинебан дестейрин членар кьуна. Жегьилар дуьз рекьелай бязи интернет-сетри, хизанра тербиясузвили, яшайишдин, культурадин ва образованидин зайиф дережади алудзава. Адет яз, руьгьдиз зайиф, кар-кеспидик квачир ва чеб чпин мумкинвилерихъ инанмиш тушир авам жегьилар гьатзава террористрин члада. Терроризмдикай хуьдай кьве рехъ ава: МВД-дин, ФСБ-дин ва къенепатан хатасузвал хуьзвай маса органрин пешекарвилин дережа хкажун, обществода терроризмдиз акси “иммунитет” арадал гъун. Терроризмдин аксина обществодин сагълам вири къуватар садна кIанда.
Общественный хатасузвал хуьнин рекьяй райадминистрациядин кьилин заместитель, АТК-дин секретарь Роберт Гьамзаева форум акьалтзавай несил гъавурдик кутадай, ватанпересвилин руьгьдаллаз тербияламишдай лап хъсан майдан-мумкинвал тирди къейдна.
Микрофондихъ РД-дин лайихлу муаллим, мергьяматлувилин “Просвещение” фондунин Президент Магьмуд Абдулкеримов гала. — “Люминари” центрада жегьилриз тарс-тербия гунин мярекатар пара тухузва. Амма къенин форум кьетIенди я. Адет яз, террористрин жергейра гъавурдик квачир, чеб гьар жуьре себебрикди властрилай нарази, бейкеф жегьилар гьатзава. Кьиблепатан Дагъустандин районра гьалар са кьадар секин я. ЯтIани, и завалдин вилик пад кьунин кIвалах зайифарна виже къведач. Акьалтзавай несилдин патахъай чи — диде-бубайрин, муаллимрин, общественный тешкилатрин хиве жавабдарвал ава, — лагьана ада.
РОВД-дин полициядин начальник, подполковник Вадим Алиева терроризмдин ва экстремизмдин тахсиркарвилерал желб авунин, обществода чIуру таблигъат тухунин карда закондин вилик жавабдарвиликай суьгьбетна: “Террористрин идеологар ксанвач. Анжах 2021-йисуз Россияда абурулай 2500-лай гзаф жегьилар чпин жергейриз чIугваз алакьна. Ахцегь районда террориствилин крариз талукь яз чна 10 протокол кхьенва. Террористри иллаки 18-25 йисан яшда авай ва дуьз тербия, образование авачир жегьилар регьятдиз чпин таъсирдик кутазва. Гьавиляй абурухъ ва диде-бубайрихъ галаз иллаки гзаф кIвалахна кIанда”.
Ахцегьрин жуьмя мискIиндин имам, райондин имамрин советдин председатель Абдулашим Гьажи Абдулгьашумова лагьана:
— Къенин мярекатди жемят садзава, жегьилриз эдеб-ахлакьдин, дуьз ацукьиз-къарагъунин тербия гузва, абур Аллагьди негьнавай ксарикайни яргъаз къакъудзава. Школа куьтягьайдалай кьулухъ дуьз тербия тахьанвай ва диндал мягькем тушир аялар пара дуьшуьшра, интернетдин таъсирдик акатна, гьайиф хьи, чи гъиляй акъатзава. Чна и кардин вилик пад кьуна кIанда.
Мярекатдал гьакI школадин директор Мейрам Рамазанова, изобразительный искусствойрин школадин директор Мегьамедзериф Гьажиев ва масабурни рахана. Мярекатдин сергьятраваз райондин общественный палатадин председатель Али Исмаилова жегьилар чи бубайрин хъсан адетралди, ватанпересвилин руьгьдаллаз тербияламишунай, абур милли культурадиз ва искусстводиз шерик авунай Магьмуд Абдулкеримоваз, Мегьамедзериф Гьажиеваз, ИЗО-дин школадин муаллим Гьажибег Алимоваз ва форумда иштиракай са десте аялриз гьуьрметдин грамотаяр гана.
Дашдемир Шерифалиев
