ЦIийи йисан вилик Дагъустан Республикадин Кьил Сергей Меликова “Мурадрин ёлка” акциядин иштиракчияр тир пуд аялдин мурадар уьмуьрдиз кечирмишна.
Уьлкведин Президент Владимир Путина тереф хвейи ихьтин къени, хъсан адетди ЦIийи йисан вилик квай йикъара Россиядин аялрин рикIер шадарзава, абур чпин мурадриз мукьва ийизва. “Мурадрин ёлкаяр” уьлкведин гьар са регионда кардик кутунва.
И адет 2018-йисалай кардик ква. Ада къени крарин иесияр тир агъзурралди агьалияр сад авунва. Акциядин кьилин макьсад аялар шадарун, абурув чеб ЦIийи йисан мярекатрин иштиракчияр тирди гьисс ийиз тун я. “Мурадрин ёлкадик” иштиракзавай аялрикай сифте нубатда начагъбуруз, кIеве авайбуруз, чIехи хизанра яшамиш жезвай аялриз фикир гузва.
Дагъустанда эцигнавай «Мурадрин ёлкадик» 3 йисалай 17 йисалди яшара авай, сагъламвилин рекьяй мумкинвилер сергьятламишнавай 200 аялди иштиракна. Абурук етимар, кесиб хизанрай тир аялар ва начагъбур квай. Акцияда иштиракун патал федеральный “ёлкажеланий.РФ” порталда регистрация авун лазим тир.
ЦIийи йис аялриз тебрикун патал РД-дин Кьил Сергей Меликовахъ галаз Аяз Буба ва Живедин Ханум атанвай.
— Чна квез алукьзавай ЦIийи йис тебрикзава. Куьн сагъламдиз, шаддиз яшамиш хьун чи мурад я. ЦIийи йисан куь мурадарни кьилиз акъатдайвал хьурай. Къе чун республикадин кьилин майдандал безетмишнавай ёлкадин патав гва. — Чав куь тIалабунар, мурадар авай чарар агакьна. Чун абур гьакъикъи крариз элкъуьриз атанва, — аялрихъ элкъвена, лагьана региондин Кьили.
Пара хъсан адетдин сергьятра аваз Сергей Меликова Къизляр шегьердай тир 13 йиса авай Олег Цыкееваз цифровой фортепиано багъишна. Сагъламсуз аял тирвиляй ам кIелиз коррекционный школадиз физва. Диде-бубайри лагьайвал, ихьтин пишкешди аялдин патай музыкадиз авай итиж артухарда, адаз сагъламвал мягькемариз куьмекда.
Махачкъаладай тир 11 йиса авай Динара Хайбулаевадиз С.Меликова батут багъишна.
Избербаш шегьердай тир 10 йиса авай Къурбан Халидова вичиз планшет хьуникай фикирзавай. Ам адаз кIелунра куьмек патал герекзавай. Халидоврин хизанда Къурбаналай гъейри мад вад аял ава. ЦIийи йисан вилик Къурбанан мурадни кьилиз акъатна.
«Лезги газет»
