ЦIийи йисан вилик Лезгийрин СтIал Сулейманан тIварунихъ галай госмуздрамтеатрдин коллективди Махачкъалада тамаша-концерт къалурна, Къумукьрин театрдин да­ра­матдиз атай ватанэгьлийрин гуьгьуьлар ачухарна, шадарна. Сегьнедиз сифте театрдин директор Динара Эминова экъечIна. Ада лагьана:

— Гьуьрметлу ватанэгьлияр, чи рикI алай тамашачияр, куьн и залда акунал чун пара шад я. ТIугъвал себеб яз, чалай, виликдай хьиз, куь патав мукьвал-мукьвал къвез жезвачир. Къадагъаяр гилани ава, ам­ма чун квез тамаша-концерт гваз атана. Чи коллективди квез алукьзавай ЦIийи йис рикIин сидкьидай тебрикзава. Квехъ сагъвал, кIва­лахда агалкьунар, кIвалера бахт-берекат хьун чи мурад я.

Концерт-тамаша культурадин дворецдин директордин кабинетда кьиле физвай гьерекатрилай га­тIунна. Им культурадин къуллугъчияр тир музыкантрин, манидаррин салаз къван гадарун тир. Жуьреба-жуьре багьнаяр акъудиз, хсуси кIвалах гадарна, абур мехъеррик физва, чпиз пулар къазанмишзава, кIус-тике директордални ацалтзава. ЦIийи йисан концерт гьазурунин тапшуругъ агакьай директор Дарданел Дарманович кIеве гьатзава. Къуллугъчияр садни авач эхир. Сек­ретаршадин (лугьун лазим я хьи, адани, Дарданелани чпин ролар устадвилелди тамамарна) теклифдалди директорди эцигунрал масанрай атанвай гастарбайтеррин куьмекдалди концерт гьазурзава. Абурухъ къекъведай декьикьайра театрдин артистри тамашачийриз маниярни лагьана.

Къейд авун лазим я хьи, тамаша-концерт виридаз пара хуш хьана. Идан гьакъиндай ара-ара залда гьатзавай  рикIивай хъуьруьнин сесери, язавай капари шагьидвалзавай. Концерт кьве сятда кьиле фенатIани, ам мадни давам хьана кIанзавай инсанриз.

Вири хъсан тир, амма кьве карди ширин чайдиз кьве тIуб кудай ис­тивут вегьей хьтин гьал арадал гъана. Сад лагьайди, вучиз ятIани, манийрин тIварар, авторар, манидарар вужар ятIа малумарнач. Тамашачийри гьар сеферда сада-садавай “им, ам вуж я?” лугьуз хабар кьаз­вай. Гьелбетда, чаз Дагъустандин халкьдин артистка Фаризат Зейналова, Дагъустандин лайихлу артист Руслан Пирвердиев, артистар тир Эльмира Къараханова, Валерик Сулейманов, Фатима Фейзуллаева чир хьана, амайбур — ваъ. Аферин виридаз, устадвилелди манияр лагьана.

Кьвед лагьайди, залдай сегьнедиз пияндаз ухшар авай ва куь­чедай­ рехъ алатна атанвай хьтин сад хкаж хьана ва кукIунар арадал гъана­. Им, сценарий кхьей касдин фи­кир­далди, концертдин вахтунда сегьнедиз экъечI­завай ва манидарриз манийвалзавай, кьуьлерзавай бязи тамашачияр критика авун тир кьван. Эхирдай кьилин режиссер Казбек Думаева “абур чи актерар тир” лагьа­натIани, тамашачияр актерри са­да-сад гъутарив ягъунин, нокдаундиз ракъурунин, сегьнедай залдиз гадарунин ва, лап пиян абдал хьиз, залдай акъудунин гъавурда гьат­нач­.

Абад Азадов