Россиядин Игит Р.Халикьован тIварунихъ галай Кьулан СтIалрин юкьван школада мукьвал йикъара Сулейман-Стальский райондин муаллимрин арада “Самый классный-классный” лишандик кваз сад лагьай сеферда тухузвай конкурс кьиле фена.
Ана школайра тухвай конкурсра гъалиб хьайи 5 муаллимди иштиракна. И конкурсда Кьасумхуьруьн 1-нумрадин юкьван школада информатикадин тарсар гузвай муаллим Омарбегова Жамила Шагьабудиновнади гъалибвал къачуна. Ам райондин образо-ванидин управленидин патай дипломдиз, пулдин премиядиз лайихлу хьана.
Ж.Омарбеговади районда чIехибурукай сад тир школада намуслудаказ кIвалахиз гзаф йисар я. Ада райондин образованидин къаюмвилик кваз тухузвай гзаф мярекатра иштиракзава, хейлин мярекатар вичи тешкилзава.
Ж.Омарбеговадин ери-бине Хив райондин ЦIийи ЗахитIрин хуьряй я. Жамила, 9-класс акьалтIарна, Дербентдин педучилищедик экечIна, 2000-йисуз анаг хъсан къиметар аваз акьалтIарна.
1999-йисуз кьадар-кьисметди Жамила Кьасумхуьрел акъудна: адани кьасумхуьруьнви Закира чпин сирер сад авуна.
Ада Кьасумхуьруьн 1-нумрадин юкьван школада библиотекадин заведующийвиле, гуьгъуьнлай муаллимвиле кIвалахна. КIвалахни ийиз, 2006-йисуз Ж.Омарбегова ДГУ-дин физикадинни математикадин факультетдик экечIна, 2011-йисуз вуз акьалтIарна.
Ж.Омарбеговади школада акьалтзавай несилдиз информатикадин тарсар гузва. И рекьяй ам райондин хъсан муаллимрин жергеда ава. Ада тарсар гузвай 20-далай виниз аялрикай райондин ва республикадин олимпиадайрин гъалибчиярни призерар хьанва.
2016-2017-кIелунин йисуз Жамила муаллим 11-классдин руководитель тир. Са ученикди къизилдин медаль къачуна. Шадвалдай кар ам я хьи, вири жаванар вузрик ва юкьван пешекарвилин кIелдай чкайрик экечIна.
Жамила Шагьабудиновна хъсан тешкилатчини я. Ада кьил кутуналди школада ва районда гзаф мярекатар тухузва. ИкI, алай кIелунин йисуз “2018-йисан лап хъсан муаллим” республикадин конкурсдин райондин пай тешкилунай ва кьиле тухунай ам райондин образованидин управленидин патай Гьуьрметдин грамотадиз лайихлу хьана.
Ж.Омарбегова хьанвай нетижайрал, тарс гузвай аялрин агалкьунрал рази хьана акъвазнавач. “Самый классный-классный” конкурсдин кIвалахдин темани ада дуьшуьшдай хкянавачир: “Зи мурадар кьилиз акъатда”. Гила Жамила муаллимди конкурсдин республикадин паюна (финалда) иштиракда.
Ж.Омарбеговадиз райондин образованидин управленидин пешекаррин, школадин муаллимрин, кIелзавайбурун ва абурун диде-бубайрин патай лайихлу гьуьрмет ава.
Асият Мирзалиева,
Хазран Кьасумов
