“Лезги газетдиз” Мегьарамдхуьруьн райондин администрациядин пресс-къуллугъдай хабар гайивал, 23-мартдиз Дагъустан Республикадин къенепатан крарин министр, полициядин генерал-лейтенант Абдурашид Мегьамедов райондиз телеф хьайи къуллугъчийрин хизанрив государстводин наградаяр вахкун патал атана.
Райадминистрациядин залда кьиле тухвай мярекатда Мегьарамдхуьруьн райондин кьил Фарид Агьмедова, райадминистрациядин аппаратдин жавабдар работникри, республикадин ва райондин къанун-къайда хуьдай органрин, СМИ-рин векилри ва маса ксари иштиракна.
Анал рахай райондин кьил Фарид Агьмедова къейдна: “Ватан ва чи кьилел ислягь цав хьун патал чпин чанар къурбанд авур кьегьалрин лайихлувилерал къимет эцигун яз, абуруз ВикIегьвилин орден гунай чун Россиядин Федерациядин Президентдилай, Дагъустан Республикадин къенепатан крарин министрдилай рази я. А ватанпересрин экуь къаматар чна рикIелай ракъурдач. Абурун игитвили викIегьвилин, гъейратлувилин чешне яз къуллугъда”.
Къуллугърин буржи кьилиз акъуддайла, викIегьвал, дирибашвал ва гьакъисагъвал къалурунай Россиядин МВД-дин Дербент шегьерда авай уголовный розыскдин отделдин начальник Мусаев Муса Мавлуьдиновичаз, полициядин старший лейтенант, кьвед лагьай батальондин махсус взводдин командирдин заместитель Сардаров Изафедин Элвеновичаз телеф хьайидалай кьулухъ Россиядин Федерациядин Президент Владимир Путинан 2017-йисан 13-октябрдин 421-нумрадин Указдалди ВикIегьвилин орден ганва.
Телеф хьайибурун хизанрив и награда вахкудайла, рахай РД-дин къенепатан крарин министрди, кьилди къачуртIа, лагьана: “Зун ихьтин везифа хиве аваз Мегьарамдхуьруьн райондиз къвез им сад лагьай сефер туш. Ашкара жезвайвал, Мегьарамдхуруьн райондай, чанарни къурбанд авуналди, чпин къуллугърин буржи тамамарзавай кьегьалар акъатзава. Амма, гьайиф хьи, виридалайни багъри ксар къакъатуникди квез жезвай магьрумвал гьич са жуьредин наградайривайни, гьич са жуьредин келимайривайни, куьмекдивайни арадай акъудиз жедач. А кьегьалрин къаматар чаз лап багьа я, чна абурун багърийриз рикIин сидкьидай гьуьрметзава, абурун дерт пайзава. Чун, РД-дин къенепатан крарин министерстводин къуллугъчияр, гьамиша куь къвалав гваз жеда ва багъри касдикай магьрум хьунин тIал кьезиларун патал алакьдай куьмек гуз чалишмишвалда”.
Наградаяр вахкуниз талукьарнавай мярекатдал райондин Общественный палатадин председатель Агъадаш Нагъметуллаев, Муса Мусаеван сифте муаллим, гьакIни Гарагърин хуьруьн кьил Къадим Чубанов ва маса ксар атана. Абуру телеф хьайи кьегьалрин хизанриз халис ватанпересар тербияламишунай разивилин рикIин сидкьидай тир келимаяр лагьана.
«Лезги Газет»
