Образованидин хиле авай гьалар ахтармишунин макьсаддалди РД-дин Гьукуматдин Председателдин заместитель — образованидинни илимдин министр Уммупазиль Омарова Мегьарамдхуьруьн райондиз мугьман хьана. Бут-Къазмайрин школада ам райондин муаллимрин коллективдихъ галаз гуьруьшмиш хьана ва ана вахтунилай вилик ЕГЭ вахкунин месэлайрай совещание кьиле тухвана.
Гуьруьшда министрдин заместитель Ширали Алиева, тестированидин федеральный центрадин кьил Юлия Егоровади, Мегьарамдхуьруьн райондин кьилин сад лагьай заместитель Гьабибуллагь Мурадалиева, райондин образованидин управленидин начальник Улубег Абейдулаева, адан заместитель Айна Гьажиевади, ЕГЭ тухунин пунктунин кьиле авай Зарема Маллаевади, умуми образованидин идарайрин кьилери ва муаллимри иштиракна.
У.Омаровади нетижаяр кьунин государстводин аттестация региондин Кьил Владимир Васильеван гуьзчивилик квайди рикIел хкана.
— Республикадин Кьили образованидин ва, кьилди къачуртIа, ЕГЭ тухунин месэлайриз иллаки кьетIен фикир гузва. Чи метлеб — дуьз ва михьи экзаменар тухун я, — къейдна министрди.
Ю.Егоровади ва Ш.Алиева 2018-йисан ЕГЭ-рин кампания тешкилун патал кIвалахдив мукьуфдивди эгечIун лазим тирди лагьана.
ЦIинин йисуз экзаменар тухудай вири пунктар печатдин ва имтигьандин материалрин комплект кьиляй-кьилиз сканироватдай цIийи технологийралди таъминарнава. Абурулай алава яз, Рособрнадзордин истемишунрив кьадайвал, экзаменар кьиле фидай виринра видео ва мобильный алакъадикай магьрумдай тадаракар эцигнава.
Ю.Егоровади чкайрал ЕГЭ-яр кьиле фидай тегьердикай галай-галайвал лагьана. Мярекатдал рахай вирибуру экзаменар тухунин пунктарин кьиле авайбурун ва ЕГЭ-дин тешкилатчийрин хиве авай жавабдарвал къейдна.
«Лезги Газет»
