И мукьвара Кьурагь райондин администрацияда муниципалитетдин кьил Замир Азизов кьиле @dag.putnik.tour турфирмадин ва @dagestan.extreme. jeep.tour проектдин руководитель Эмир Фаталиев авай ва турфирмайрин, мугьманханайрин иесийрикай, журналистрикай, маркетологрикай, этнографрикай ва тарихчийрикай ибарат делегациядихъ галаз гуьруьшмиш хьана.
Гуьруьшдал районда туризмдин хел виликди тухунин, сиягьатчияр патал къулай шартIар тешкилунин месэлаяр веревирдна.
Къецепатан регионрай атанвай делегациядик «ЦIийи маршрут» (Москва) турфирмадин руководитель Мегьамед Дибирмегьамедов, Урусрин Географиядин жемиятдин член, Travel Ivanova клуб арадал гъанвай Ольга Иванова (Москва), Akhmed_tur компаниядин руководитель Агьмед Хасаев, и компаниядин пешекарар тир Зарема Хасаева, Магьмуд Магьмудов, “Этнотур — Дагестан” турфирмадин белед-экскурсовод Константин Демченко, са жерге маса карханайрин ва компанийрин векилар квай.
Райондин кьилихъ галаз хьайи гуьруьшдал мугьманри туристар патал къешенг чкайрин патарив тIуьнар гудай чкаяр ва мугьманханаяр арадал гъунин месэлаяр веревирдна. Райондин кьили и кIвалах муниципалитетда гъиле кьунвайдакай, и карда кIвенкIвечивал авур Эмир Фаталиеваз лазим тир вири жуьредин куьмекар гуз гьазур тирдакай лагьана.
Делегатри къейд авурвал, райондикай гегьенш майданра хабар авач, адан мумкинвилер малум туш. Гьаниз килигна, турфирмайрин иесийри чеб иниз туристар гъиз чалишмиш жедайдакай ва Кьурагь райондин мумкинвилер раиж ийиз алахъдайдакай, идалди район республикадин туризмдин картадал машгьур чкадиз элкъуьрдайдакай лагьана.
Гуьруьшдилай гуьгъуьниз адан иштиракчияр Эмир Фаталиевахъ галаз санал райондин итижлу, гуьзел чкайриз, месела, саки квахьнавай Кьуьчхуьррин хуьруьз, Хвережиз, Кекен дагъдин кIуквал алай дуьзендиз, Кьурагьрин МиркIи дагьардиз, Яд гур-гур чарчардиз, Каур вириз килигиз фена.
«Лезги газет»
