Чи алимар
Мукьвара зун илимдин рекье кьетIен агалкьунар къазанмишнавай жегьил алимрин жергедай тир мад са ватанэгьлидихъ галаз таниш хьана. Къе заз ДГУ-дин физикадин факультетдин декандин заместитель, 2012-йисалай и факультетдин жегьил алимрин советдин председатель, ФКСиН-дин (физика конденсированного состояния и наносистем) кафедрадин чIехи преподаватель, университетдин УНИР-дин (управление научно-исследовательских работ) ва “Нанотехнологии” НОЦ-дин (научно-образовательный центр) илимдин къуллугъчи Султанагьмед Ханагьмедович Гьажимегьамедовакай ихтилатиз кIанзава.
Ам 1983-йисан 17-ноябрдиз СтIал Сулейманан райондин ДаркIушрин хуьре дидедиз хьана. Хуьруьн мектеб тафаватлудаказ куьтягьайдалай кьулухъ ада кьатIана хьи, илимдин рекье кьетIи камар къачун патал анжах мектебда къачунвай чирвилер бес жедач. Ихьтин фикирдал алаз ам физикадинни математикадин хиляй мадни артух чирвилер къачун патал сифтедай Астрахандиз, гуьгъуьнлай Москвадиз фена ва махсус курсара кIелна.
2001-йисуз математикадайни физикадай агалкьунралди имтигьанар вахкайдалай кьулухъ ам ДГУ-дин физикадин факультетдик экечIна. Яру дипломдалди вуз акьалтIарай 2006-йисуз ам ГАК-дин теклифдалди хкянавай пешедин рекьяй аспирантурадик, гьа са вахтунда и йисуз Грозныйдин нафтIадин институтдин инженерно-экономический факультетдикни заочнидаказ экечIна (2009-йисуз и вузни яру дипломдалди куьтягьна).
С.Гьажимегьамедован иштираквал аваз цIийи затIар арадал гъидай цIийи къайдаяр, технология арадал гъана. Жегьил алимди кьилиз акъуднавай ахтармишунриз илимда, тежрибада еке итиж ийизва, ада арадал гъанвай технологиядикай электроникадани электроэнергетикада хъсан менфят къачудай мумкинвал гузва.
Илимдал ам гьеле студент тир вахтарилай машгъул я. Аспирантурада кIелдай вахтунда ада хкянавай пешедин рекьяй вич савадлу ва хсуси ахтармишунар кьиле тухуз жедай алакьунар авай пешекар тирди тестикьарна. Алатай йисара ам са шумудра грантриз лайихлу хьана, 2006 ва 2008-йисара университетда тIебии ва гуманитарный илимрай кьиле фейи лап хъсан илимдин кIвалахдин конкурсда “ТIебии илимар” номинацияда гъалиб хьана, 2012-2014-йисара “ДГУ стратегиядин рекьяй вилик тухунин программа” грантар кьилиз акъудна.
Ам чи ва къецепатан уьлквейрин журналра чапдай акъатнавай илимдин 150-далай гзаф макъалайрин авторрикай сад я, адан хейлин кIвалахрикай дуьньядин дережадани менфят къачунва. Ибурулайни гъейри, ам 2 патентдин, цIийи затI гьасилунин сирдин шагьадатнамадин сагьиб я.
Султанагьмед Гьажимегьамедова 2021-йисан 18-мартдиз физикадинни математикадин илимрин кандидатвилин диссертация “Структура, состав и свойства наноструктурированных YBCO материалов” темадай ахтармишунрин “Курчатовский институт” центрада хвена. Илимдинни ахтармишунрин кIвалах ада физикадинни математикадин илимрин доктор, ДГУ-дин физикадин факультетдин профессор Д.К.Палчаеван регьбервилик кваз тамамарна. Диссертациядин советдик кваз хьайи 20 алимдини чи ватанэгьлидин илимдин кIвалахдиз хъсан къимет гана.
С.Гьажимегьамедова мукьвал-мукьвал Россиядин, международный конференцийра иштиракзава. Зегьметдин рехъ ада ДГУ-да 2003-йисуз лаборантдин къуллугъдилай гатIунна. Савадлувал къалурай пешекардикай гуьгъуьнлай кьилин инженер, преподаватель, чIехи преподаватель хьана.
2010-йисуз физикадай Вирироссиядин олимпиададин республикадин паюнин призер гьазурунай адан алахъунар гьуьрметдин грамотадалди къейдна. Вузда методикадинни илимдин рекьяй бегьерлувилелди кIвалахунай, жегьил алимриз, аспирантриз, студентриз куьмекар гунай адав шабагь агакьна. Алимдин гъилик чирвилер къачузвай студентрин арадай кьуд касдикай «УМНИК» лишандик кваз тешкилнавай грантрин гъалибчияр хьана.
Султанагьмед Гьажимегьамедован хизанда пуд аялдиз тербия гузва. Чна умуд кутазва хьи, вичин кардив рикI гваз, гьевесдивди эгечIнавай алимдихъ кIвалахдани илимда мадни еке агалкьунар жеда.
К.Ферзалиев
