Республикадин бюджетдин пайгарвал хуьн патал Дагъустандив федеральный бюджетдай 335 миллиондилай гзаф алава такьатар агакьда. Ихьтин малумат федеральный кабминдин сайтда чапнавай РФ-дин Гьукуматдин Кьил Михаил Мишустинан къарарда ава.
Ахъайзавай такьатрин гьисабдай бюджетникрин мажибар артухар хъийидайвал я. Адалайни гъейри, и такьатрикай яшайишдин объектар эцигунин, рекьер къайдадик кухтунин месэлаяр гьялуниз серфда.
Къейдзавайвал, бюджетдин дурумлувал хуьн патал Россиядин 45 региондиз алава такьатар гун фикирдиз къачунва. И макьсад патал федеральный бюджетдай 29,3 миллиард манат чара ийидайвал я.
Дотацийрин кьадардал гьалтайла, алай йисуз Дагъустан уьлкведин субъектрин арада кIвенкIвечи жергейра хьана. Йисан нетижада чи республикадив агакьдай такьатрин умуми кьадар 72,9 миллиард манатдиз барабар жеда. Бюджетрин таъминвал патал 2021-йисуз регионриз дотацияр яз 718 миллиард манат чара авуна. 2019-йисандав гекъигайла, им 43 миллиарддин гзаф я.
«Лезги газет»
