Алатай гьафтеда СтIал Сулейманан райондин Агъа Хъартасрин хуьруьз газ ахъаюнин шадвилин мярекат кьиле фена. Лишанлу и вакъиа тебрик авун патал хуьруьз райондин кьил Нариман Абдулмуталибов, “Дагсельхозстрой” ГКУ-дин директор Мегьамед Юсупов, РД-дин гьукуматдин капитальный эцигунрин управленидин векил Руслан Исмаилов, райадминистрациядин жавабдар работникар атанвай.
Шадвилин мярекат Нариман Абдулмуталибова ачухна. Ада хуьруьнвийриз газ ахъаюн мубаракна. Агъа Хъартасрин хуьруьз газ гъунин кIвалахар тайин метлебдихъ элкъуьрнавай “Хуьрерин мулкар 2014-2017-йисара ва 2020-йисалди дурумлудаказ виликди тухун” федеральный программадин сергьятра аваз тамамарнава. КIвалахрин заказчик “Дагсельхозстрой” ГКУ-ди 2021-йисан сифте кьилера газ гъунин вири кIвалахар тамамвилелди акьалтIарна. Хуьруьн 70 процентдив агакьна агьалийри лицевой счетар ахъайнава.
Хъартасвийриз газ ахъаюн Мегьамед Юсупова, Руслан Исмаилова, райондин собранидин депутат Назидин Гьажимирзоевани мубаракна.
Хуьруьн агъсакъал, педагогвилин зегьметдин ветеран Керим Керимова хуьруьнвийрин тIварунихъай и проект кьилиз акъудай организацийриз ва вири юлдашриз чухсагъул лагьана.
ШартIунин факелдик цIай кягъунин гьуьрметдин ихтибар Нариман Абдулмуталибоваз, Мегьамед Юсуповаз, Руслан Исмаиловаз, Керим Керимоваз авуна. 40 кIвал авай хуьруьз газ ахъаюнин шадвилин мярекат мугьманар къунагъламишуналди акьалтIна.
Хазран Кьасумов
