Духтурвилин пеше дуьньяда лап къадимбурукай ва эвелимжи нубатда герекбурукай сад я. Адав вири девирра кьетIен гьуьрметдивди эгечIзавай. Эгер адетдин инсанди са кас дуьшуьшдай хьиз къутармишайтIа, адаз игитдиз хьиз килигиз, тебрикда, шабагьар гуда. Амма духтурдиз инсандиз куьмекун, ам сагъарун, къутармишун гьар йикъан адетдин кар я. Гиппократан кьинез вафалу, гъилер ва намус михьи гьахьтин духтур герек макъамда ацалтун инсандин бахт я.
И сеферда, Аллагьдиз шукур, зи бахтуни гъана, тахьайтIа, вил амачиз амукьдай. Багъда кIвалахдайла, вилиз хасаратвал хьана, тади гузвай. Гьар вацран эхиримжи гьяд юкъуз Ахцегьа медицинадин “Самур” комплексдиз Махачкъаладай И.Ш.Исмаилован тIварунихъ галай “Медицинадин вилик фенвай технологийрин центрадай” пешекар къвезвайди чиз, зун гьадан патав фена. Сад лагьай мертебадин дегьлизда, офтальмологдин кабинетдихъ 4-5 кас азарлуяр галай. Нубат атайла, юкьван буйдин, ачух чинал мили хъвер алай жегьил духтурди зун хушдиз кьабулна. Дикъетдивди яб гана, вилер ахтармишна. “Хъсан хьана вун вахтунда атана. Вилин сетчатка къазун хьанва. Пака, гьяддиз, Махачкъалада чи клиникади кIвалахзавач. Ислендиз сятдин кIуьдаз зи кьилив ша, лазердин куьмекдалди операция авунин чарасузвал ава. Гьакьван чIавалди кIелдай, гьатта телевизордиз килигдай ихтиярни гузвач. Чин винелна, къатук, ял ягъа…”, — лагьана, ада талукь тир справка кхьена.
Куьрелди, духтурди лагьайвал авуна. Ада лазердин операция лап хъсандиз кьиле тухвана. Гьич вил кутIунунни лазим тахьана, герек тир дарманар кхьена, талукь тир теклифар гана, зун гьа юкъуз кIвализ аххъайна. Са вацралай ахтармиш хъувурла, вил хъсан хьанвай.
КIусни дамах, такабурлувал гвачир бажарагълу офтальмохирург духтур завай рикIелай алудиз жедани кьван! За адаз жуван ва гьакIни адан кьезил гъиликай куьмек хьайи цIудралди масабурун (Ахцегь, Докъузпара ва Рутул районэгьлияр) патайни чухсагъул малумариз кIанзава. Сагърай вун, Шамил Мегьамедович, инсанвилин къени къилихрай, виниз тир пешекарвиляй, масадан дердидикай хабар кьунай. Чкадал жемятдиз куьмек гудай вилерин хъсан духтур алачиз акурла, вацра садра хуьруьн чкадиз къвез, инсанриз куьмекун — им Аллагь рази жедай карни я. Къуй ваз чандин сагъвал, яргъи ва хушбахт уьмуьр гурай. Чухсагъулвилин хуш келимаяр чаз гьакI Ахцегьа медицинадин “Самур” центр эцигна кардик кутунвай кьегьал хва Жигерхан Сулеймановаз ва Махачкъаладай бажарагълу духтурдиз теклифнавай “Самур” медцентрадин кьилин духтур Гуьлнара Магьмудовадизни лугьуз кIанзава.
Абдуллаев Шамил Мегьамедович 1982- йисуз Махачкъалада зегьметкеш хизанда (буба — полициядин отставкада авай полковник) дидедиз хьана. Адан ери-бине Хив райондин Кулик хуьряй я. 1999-йисуз Махачкъаладин 30-нумрадин школа, 2005-йисуз Дагмедакадемия агалкьунралди акьалтIарна. Махачкъалада вилерин азаррин клиникада интернатурада кIелна. 2006-йисалай Махачкъалада “Медицинадин вилик фенвай технологийрин центрада” лазердин куьмекдалди операцияр ийидай методикадай кIвалахзава. Медицинадин курсара (“Лазерная хирургия флуоресцентная ангиография”) пешекарвилин дережа хкажайвилин сертификат къачунвай духтурдал эхиримжи йисара лазердин офтальмохирургиядин отделенидин заведующийвилин жавабдар къуллугъ ихтибарнава.
— Ахцегьа, санлай Самур дереда жемятдиз офтальмолог духтурдин игьтияж ава лагьана, цIийиз ачухнавай “Самур” медкомплексдиз теклифайла, завай “ваъ” лугьуз хьанач. Ингье саки 5 йис я за гьар вацран эхиримжи кишдин юкъуз (масакIа жезвач), жуван алатарни гваз атана, ина пакаман сятдин муьжуьдалай азарлуяр кьабулзава. Парабуруз гьа чкадал куьмекнава, 40 — далай виниз азарлуйриз, Махачкъаладин клиникадиз теклифиз, вилериз лазердин гьар жуьре операцияр авунва. Ахцегьа гьуьрметлудаказ кьабулзавай тегьердал ва азарлуяр кьабулун патал яратмишнавай къулай шартIарал зун рази я. Пара кьадар сагърай, — лугьузва духтурди!
Шамил Мегьамедовича, жемятдихъ элкъвена, лугьузва.
— Беден хвена кIанда. Инсанри гьикьван уьмуьрдин сагълам къайда тухвайтIа, гьакьван абур сагълам жеда. Мадни, чи дагъвийрик са хесет ква: са гьихьтин ятIани хасаратвал (месела, вилериз), кефсузвал хьайила, вич-вичелай хъсан хъжеда лугьуз ацукьда. Им еке ягъалмишвал я. Кефсуз хьайила ва я кьилел дуьшуьш атайла, духтурдин кьилив вахтунда атана кIанда.
— Ял ядай юкъуз хушуналди яргъал мензилдиз къвез, чи жемятдиз куьмекзавай ва меслятар гузвай вун пара кьадар сагърай, гьуьрметлу духтур!
Дашдемир Шерифалиев
