Дербент шегьерда “Комплексное территориальное развитие городского округа г. Дербент” программа уьмуьрдиз кечирмишунин сергьятра аваз шегьердин тарихдин паюна аваданламишдай кlвалахар тухун давам жезва. Программадин сад ла­гьай паюнал асаслу яз, муьжуьдни кlуьд лагьай магьалар аваданламишнава. Гила ирид лагьай магьалдилай Крупскаядин куьчедал кьван ремонтдин кlвалахар кьиле физва.

Алай вахтунда ана хъвадай цин турбаяр, къвайи марфарин ятар ва кlвалерин чиркинар физвай линияр цlийибуралди эвезна­ва ва вири кlвалер а линийрик кутунва. Гьакlни экверин цlийи ли­ния чиликай тухванва. Куьчеда къванни твазва.

Объектдал 20-25 касди ва ругуд машинди — махсус техникади кlвалахзава.

Шегьердин тарихдин магьалра кlвалахар кьиле физвай гьал ше­гьер­дин кьил Рустамбег Пирмегьамедова вичин заместитель Ар­тур Гьамзатовахъ ва УЖКХ-дин начальник Руфет Алиевахъ галаз ахтармишна. Ам, санлай къачурла, кlвалахар физвай гьалдилай рази яз амукьна. Инлай абур VIII  асирдин шаркь патан итимрин гьамамдин къаншарда авай халкьди ял язавай чкада аваданламишунин кlвалахар кьиле физвай гьалдиз килигна. Планда авайвал, ина аялриз къугъвадай чка, ял ядай зона туь­кlуьрда, набататар цада ва куьсрияр эцигда.

Тоннелдин куьчеда чиркин ятарин линия бетондин бинедал эцигзава.

Винидихъ тlвар кьур программадин сергьятра аваз сад лагьай Нагорный куьчени аваданламишзава. 200 метр яргъивал алай и куьчеда “Маяк” ООО карханади кlвалахзава. ЖКХ-дин от­делдин кьилин пешекар Исамудин Абдурагьимован гафаралди, ина канализациядин турбаяр дегишарда, куьчеда  къир цада, тротуарра къван твада.

“Маяк” карханади гьакlни Огородный куьчеда 200 метр мензилдиз къир цаз гатlуннава. Амни, Нагорный куьче хьиз, аваданламишда. Алай йисан эхирдалди, планда къалурнавайвал, шегьерда 12 куьче цlийи кьилелай туькlуьр хъувуна куьтягьда.

Къагьриман Ибрагьимов