14-декабрдиз РД-дин Гьукуматдин Председатель Абдулпатагь Амирханова са жерге муниципалитетра образованидин цIийи объектар ишлемишиз вахкунин месэладай совещание кьиле тухвана. Кьилди къачуртIа, Мегьарамдхуьруьн, Ахцегь ва Хасавюрт районра цIийи мектебар кардик кутунин, Къизилюрт шегьерда, Къумторкъала ва Сергокъала районра аялрин бахчайриз лицензияр гунин месэлайриз килигна.
Къейд авурвал, алай вахтунда 4 мектебдин дараматар эцигунин кIвалахар саки акьалтIарнава, гьа жергедай яз пуд сменада кIелун арадай акъудунин программадин сергьятра аваз — Ахцегь ва Хасавюрт районра эцигзавай пуд мектебдин кIвалахарни. КIелдай цIийи чкаяр арадал гъунин мураддалди Мегьарамдхуьруьн райондин Оружба хуьрени цIийи мектеб эцигзава.
Эцигна акьалтIарнавай аялрин бахчайриз лицензияр тайинарунин патахъай РД-дин образованидинни илимдин министрдин везифаяр вахтуналди тамамарзавай Я.Бучаев рахана. И объектар муниципальный хсусиятдиз вахкунин къарар кьабулнава.
Веревирдерин нетижада Абдулпатагь Амирханова, ихтилат физвай объектар ишлемишиз вахкуниз гьазурвилер аквадайла, талукь ведомствойри вири терефрихъай ахтармишун, чкадал фена, кIвалахдин еридиз къимет гун чарасуз тирди къейдна.
«Лезги газет»
