ВОЗ-дин малумат
Виридуьньядин здравоохраненидин тешкилатди малумарзавайвал, коронавирусдин омикрон-штамм гегьеншдиз чукIунин хаталувал ава. Идакай “Новости” РИА-ди хабар гузва.
И йикъара Великобританияда, “омикрон” себеб яз, са кас кьена. Вирусдин цIийи штамм сифтедай ноябрдин эхирда Ботсванадани ЮАР-да дуьздал акъуднай. Пешекаррин фикирдалди, цIийи штамм идалай вилик коронавирусдик начагъ хьайибурукни, вакцинадин рапар янавайбурукни акатун мумкин я. Гамалеян тIварцIихъ галай центрадин директор А.Гинцбурга къейднавайвал, рапар янавайбуру начагъвал кьезилдаказ алудда.
Уьлкведин Роспотребнадзордин кьил А.Поповади хабар гайивал, Россияда коронавирусдин “омикрон” штамм дуьздал акъуддай тест-система арадал гъанва. Иммунолог, медицинадин илимрин кандидат Н.Крючкова къейднавайвал, Россияда тIугъвал 2-3 йисуз мад давам жеда. Адан фикир “RT” чешмеди малумарна.
Чи уьлкведа коронавирус акатайбурун кьадар 10 миллиондилай алатнава, кьенвайбурун кьадар — 292 агъзурдалай. Дуьньяда коронавирусдик 5 миллионни 300 агъзурдалай виниз ксар кьена.
Яракьрал къадагъа эцигна
Германиядин виликан канцлер А.Меркела НАТО-дин хиляй Украинадиз ракъурзавай яракьрал къадагъа эцигна. Идакай “Bild” чешмеди хабар гузва.
Къейдзавайвал, Киевди гьакъи ганвай Америкадин яракьар агакьарунин гьерекат акъвазарунин ихтияррикай Берлинди майдин вацра менфят къачуна. Яракьар ракъуруниз аксивалунин жигьетдай чеб тек туширди къалуруналди, а чIавуз Меркель кьиле хьайи гьукуматди Нидерландарни и къарардин терефдал гъана. Августдиз Украинадин президент В.Зеленскийди А.Меркелевай фикир дегишарун тIалабнайтIани, ада а кар кьабулнач. Са кьадар яракьар агакьурунин гьерекат анжах ноябрдин вацра гуьнгуьна хтуна.
В.Зеленскийди идалай вилик Германиядивайни яракьар къачуз кIанзавайдакай малумарнай. Амма Германиядин къецепатан крарин министр Х.Мааса къалмакъалар авай зонадиз яракьар ракъурун рехъ тагана кIани кар тирди лагьанай.
Австрия рази я
Австриядин цIийи канцлер К.Нехаммера “Северный поток-2” газдин турба кардик кутунин тереф хуьзва. Адан фикирдалди, Украинадин гьалар себеб яз газдин турба кардик кутуниз манийвал гун дуьз туш.
“Spiegel” чешмедин делилралди, Россиядин “Северный поток-2” газдин турба Европадин умуми проект я, гьавиляй, Украинадин гьалариз килигна, ам Россиядиз аксивалдай такьатдиз элкъуьруниз рехъ гана кIанзавач.
Нехаммера къейд авурвал, газдин турба кардик кутуникди неинки Россиядиз, гьакI Германиядизни, Австриядизни, Евросоюздин муькуь членризни хийир жезва. Амма Германиядин МИД-дин кьил А. Бербока хабар гана хьи, гуя Европадин энергетикадин къанунрин истемишунрив кьазвач лугьуз, Россиядин газдин турба кардик кутунилай гьелелиг разивал ийиз жезвач.
Махсус векил тайинарда
Туьркиядихъ галаз рафтарвилер къайдадик кутун патал Эрменистанди махсус векил тайинардайвал я. Идакай а уьлкведин МИД-дин пресс-секретарь В.Унаняна хабар гана.
Уьлквейрин арада алакъаяр хъсанарун патал кьве терефдини векилар тайинаруникай идалай вилик Туьркиядин МИД-дин кьил М.Чавушогълудини лагьанай.
Къейд ийин, Туьркиядинни Эрменистандин арада авай часпар Анкарадин теклифдалди 1993-йисалай агалнава, абурун арада дипломатвилин алакъаярни авач. Уьлквейрин арада алакъайрин муракабвал арадал атунин себебрикай сад Анкаради Къарабахдин месэлайра Азербайжандин тереф хуьнихъ галаз алакъалу я.
Къавалай муркIар аватна…
Санкт-Петербургда дараматдин къавалай муркIар аватуникди кьве касдин сагъламвилиз зарар хьана, хабар гузва “Новости” РИА-ди.
Арадал атай агьвалатдин гьакъиндай талукь райондин прокуратуради ахтармишунар кьиле тухузва. Гуьзчивал тухунал ва къавар вахтунда михьи авунал машгъул тешкилатри къанундал амалзавай тегьердиз къимет гуда.
Къаварилай муркIадин къаябар, чIутхваррикай муркIуцIар аватуникди инсанриз хасаратвилер гузвай дуьшуьшар хъуьтIуьн вахтунда тIимил жезвач. Хаталувал авай чкайра къекъведайла, инсанри дикъетлувал квадар тавун важиблу я.
Индонезияда залзала
“Лента.ру” чешмеди хабар гузвайвал, Индонезиядин къерехра 7,7 баллдин магнитудадин залзала хьана. Чкадин метеорологиядин агентстводи къейднавайвал, и жуьреда чил зурзуникди цел зурба лепе акьалтунин хаталувал ава.
«Лезги газет»
