“Лезги газетдин” дустарикай сад, пара къени инсан, шаир-лирик, публицист Буба Меликов чи арадай акъатна. Б.Меликов 1951-йисуз Кьасумхуьрел дидедиз хьана. Юкьван школа, ахпа Буйнакскда финансрин техникум, Ростов шегьерда халкьдин майишатдин институт акьалтIарайдалай кьулухъ Махачкъалада, СтIал Сулейманан, Къумторкъала, Къизилюрт районра финансрихъ галаз алакъалу жуьреба-жуьре къуллугъар тамамарна.

Шиирар ада мектебда кIелзавай йисарилай кхьизвай. Абур райондин, республикадин газетра, “Самур”, “Кард” журналра, гьакIни умуми кIватIалра чапна. Б.Меликован “Муьгьуьббатдин нурара” шииррин ктаб лезги ва урус чIаларал акъатна. Вичин алакьунар ада гьикаятдани къалурна.

Шаирдин са кьадар чIалариз композиторри гьаваяр кхьенва.

Б.Меликов, хизан кутуна, Къумторкъала райондин ­Темиргое хуьре яшамиш жезвай. 5-декабрдиз ам и хуьруьн сурара фаракъатна.

Буба Меликов РФ-дин журналистрин Союздин член, жуьреба-жуьре тешки­лат­рин, ведомствойрин патай ганвай ме­далрин, грамотайрин сагьиб тир. Буба Ме­ликован экуь къамат ам чидайбурун рикIера яргъалди амукьда.

Чна рагьметлудан хизандиз, мукьва-кьилийриз башсагълугъвал гузва.

“ЛЕЗГИ ГАЗЕТДИН” редакциядин коллектив