5-декабрдиз чав пашман хабар агакьна: тIвар-ван авай шаир, халичаяр хурунин магьир устIар, медениятдин “Куьредин ярар” макандин гьуьрметлу векил Мислимат Тагьировна Агьмедпашаева (СтIал Мислимат) 97 йисан яшда аваз рагьметдиз фена. Лезги эдебиятни меденият патал еке магьрумвал я. СтIал Мислиматан тIвар эдебиятдал рикI алайбуруз, “Лезги газет” кIелзавайбуруз фадлай чида.
М.Агьмедпашаева 1924-йисан августдиз Кьасумхуьруьн райондин Кьулан СтIалрин хуьре дидедиз хьана. ГъвечIи чIавалай искусстводиз, шииратдиз майилвал авур Мислимат Тагьировнадикай гамар хурунин машгьур устIар, шииратдин са шумуд ктабдин (“Дуьнья я ман..”, “ТIебиатдин лишанар”, “Зи дуьнья”, “Шиирар”, “КIела, азиз балаяр” ва мсб) автор хьана. Адан гъилин халичайриз жуьреба-жуьре выставкайра чIехи къимет гана. Гуьрчег халичаяр яратмишунай адаз Индиядин премьер-министр Индира Гандидилайни чухсагъулдин чар хтанай.
Кьасумхуьрел педагогвилин курсар акьалтIарайдалай кьулухъ ада КIварчагърин ва Вини СтIалрин мектебра муаллимвални авуна.
Мислимат Агьмедпашаевади ЧIехи Гъалибвиликни вичин пай кутуна: ам кьве сеферда Дербентдинни Маджалисдин арада далу патан зегьметдин фронтдиз вичин хушуналди фена. СтIал Мислиматан экуь къамат чи рикIера амукьда.
Чна рагьметлудан хизандиз, мукьва-кьилийриз, вири хуьруьнвийриз башсагълугъвал гузва.
“ЛЕЗГИ ГАЗЕТДИН” редакциядин коллектив
