Ял ядай югъ жедайвал
Госдумадин зегьметдин, яшайишдин сиясатдин ва ветеранрин крарин рекьяй комитетдин векилри 31-декабрь чи уьлкведа гьамиша ял ядай югъ яз тестикьарунин теклиф гана.
“Чаз чизва хьи, 31-декабрь гьакIни кIвалах тийизвай югъ я. Вини кьил нисиналди кIвалахзава. Амма и юкъуз ЦIийи йисан сувар къаршиламишунин гьазурвилер аквазва… Зи фикирдалди, и йикъакай ял ядайди авуртIа, дуьз жеда”, — лагьана теклифзавайбурукай сад тир Госдумадин векилди.
Гуьгъуьнлай веревирдда
РФ-дин Президент В.Путинахъ галаз видеоконференциядин къайдада ихтилатар авурдалай кьулухъ США-дин президент Ж.Байденаз Украинадин президент В.Зеленскийдихъ галаз бязи месэлаяр веревирд ийиз кIанзава. Идакай “Новости” РИА-ди хабар гузва.
Къейд ийин, Россиядинни США-дин регьберрин арада суьгьбет 7-декабрдин нянрихъ кьиле фена. Абуру Украинадин къизгъин гьалар, НАТО-ди Россиядин сергьятдихъ гьерекатунин делилар веревирдна.
Къимет гана
ВОЗ-ди тестикьарнавайвал, вишелай гзаф уьлквейра ковиддиз акси рапар янавайбурун кьадар 40 процентдилай тIимил я. “ТАСС” чешмеди раижзавайвал, ихьтин фикир ВОЗ-дин гендиректор Т.Гебрейесуса малумарна.
Идалай вилик ВОЗ-ди, гьич тахьайтIа, гьар уьлкведин агьалийрин 40 процентди вакцинация авун герек тирди тайинарнавай. Къейдзавайвал, и дережадиз акъат тавунвай уьлквейрин кьадар вишелайни алатнава ва абурун чIехи пай Африкадин уьлквеяр я. Чешмедин делилралди, и уьлквейра коронавирусдиз акси рапар ягъунин еришар яваш хьунин асул себеб игьтияж авай вакцина вирибурув агакь тавунихъ галаз алакъалу я.
ВОЗ-ди гьакIни малумарнава хьи, вирусдин омикрон-штамм пайда хьунихъ галаз алакъалу яз цIийи вакцина арадал гъунин чарасузвал авач. Виридуьньядин здравоохраненидин тешкилатди гьисабзавайвал, цIийиз чикIизвай штаммриз мадни хъсандиз таъсир авун патал авай вакцинайрал кIвалах хъувун лазим я.
ХъуьтIуьн няметар
Духтур Х.Зокколанан фикирдалди, иммунитет мягькемарун патал хъуьтIуьн вахтунда D,C витаминар, цинк ишлемишна кIанда. Пешекардин меслятар “Express” чешмеди раижнава.
Ада D витамин ракъинин экуьнихъ галаз алакъалу тIебии затI я лагьана. Гьавиляй рагъ са акьван акван тийизвай хъуьтIуьн варцара D витамин квай затIар (пи квай балугъ, якIун суьрсетар, ниси, какадин къиб) тIуьниз ишлемишун хийирлу яз гьисабзава. Пешекарди алава хъийизвайвал, аптекайрай витаминар маса къачудайла, сифте нубатда духтурдин патав фин, ишлемишунин кьадарар тайинарун герек я.
Цавай гьужумна
Сириядин “Sana” чешмедин делилралди, Израилдин ВВС-ди Сириядин Латакия шегьердин порт авай райондал авиациядин ягъунар кьилиз акъудна.
Къейдзавайвал, Израилдин ракетайрин гьужумдик Латакиядин портунин контейнеррин майдан акатна. Инсанриз хасаратвилер хьанач.
Израилдин авиацияди Хомс вилаятдал гьужум авурдакай Сириядин армияди 24-ноябрдизни малумарнай. Ракетайрин вилик пад саки кьунайтIани, а чIавуз ислягь уьмуьр кьиле тухузвай чкадин кьве агьали кьенай.
Яракьар тIалабзава
Украинадин оборонадин министр Резникова США-дивай яракьар агакьарунин кар гегьеншарун тIалабнава, гьа жергедай яз — США-ди Афгъанистандиз ракъурун патал гьазурнавайбурун гьисабдайни. Идакай “Foreign PoIicy” чешмеди хабар гузва.
Бегемотрик коронавирус акатна
Бельгиядин зоопаркда авай бегемотар азарлу хьайидалай кьулухъ ветеринарри абурун гьал ахтармишна, нетижада кьве бегемотдик коронавирус акатнавайди винел акъатна, хабар гузва чкадин “Het NieuwsbIad” чешмеди.
Гьайванрик ковид акатунин себебдай гьеле кьил акъудиз хьанвач. Къейдзавайвал, зоопаркда санитариядин сережемрал кIевелай амалзавай ва къуллугъчийрикни вирус акатай дуьшуьшар малум туш.
Санкцийриз жаваб гуда
Белоруссиядин премьер-министр Р.Головченкоди рагъакIидай патан уьлквейра малумарнавай санкцийриз талукь яз кьабулдай жавабдин серенжемрикай ихтилатна. Идакай “ТАСС” чешмеди хабар гана.
Ада къейд авурвал, Белоруссиядин терефди, акси серенжемар кардик кутазвайбуруз жаваб яз, са жерге сергьятвилер малумарда.
“Чна садрани гьужумнач, амма чаз акси яз экономикадин дяве малумарнаватIа, гьелбетда, ахьтин гьерекатар жавабар таганани тадач”, — лагьана Р. Головченкоди.
«Лезги газет»
