6-декабрдиз Кьасумхуьрел Ибадуллагь Тагьирован тIварунихъ галай медени­ятдин маканда кьиле фейи, чIехи алим Алкьвадар Гьасан эфендидин ирсиниз бахшнавай мярекатди сиясатдинни жемиятдин векилар, алимар, динэгьлияр ва масабур санал кIватIна. Арифдар дидедиз хьайидалай инихъ 187 йис тамам хьу­­нихъ галаз алакъалу яз международный дережада аваз тешкилай конференция лишанлу вакъиадиз элкъвена. Ана неинки са Дагъустандин жуьреба-жуьре шегьеррайни районрай, гьакIни къецепатан уьлквейрай хтанвай кесер авай мугьманри иштиракуни мярекатдин важиб­лувиликай лугьузвай. СтIал Сулейманан рай­­ондин имамрин Советдин теклифдалди РД-дин милли сиясатдин ва динрин крарин рекьяй министерстводин, Муфтиятдин, райондин администрациядин куьмекни галаз кьиле тухвай конференциядин иштиракчийрин арада Къиргъизистандин динрин крарин рекьяй государстводин  комиссиядин директор Тойгонбай Абдыкаров, и уьлкведин муфтий Замир Ракиев, РД-дин милли сиясатдин ва динрин кра­рин рекьяй министрдин везифаяр вахтуналди тамамарзавай Энрик Муслимов, Кьурагь, Агъул, Хив районрин кьилер — За­мир Азизов, Закир Къаидов, Ярмет Яр­метов, алим, философиядин илимрин доктор Омар Гьуьсейнов, “Лезги газетдин” кьилин редактор Мегьамед Ибрагьимов, Дагъустандин муфтийдин заместитель Шамил Алиханов, Алкьвадар Гьасанан тIварунихъ галай музейдин директор Гьуьсейн Гьуьсейнов ва масабур авай. Мярекат СтIал Сулейманан райондин кьил Нариман Абдулмуталибова кьиле тухвана.

Конференция Алкьвадар Гьасанан птулрикай тир Абдулла Гьамидова Къу­ръандин аятар кIелунилай гатIунна. Гуьгъуьнлай Нариман Абдулмуталибова мугь­манар, иштиракчияр тебрикна, чIехи арифдарди тунвай девлетлу ирсинихъ не­силар патал авай важиблувал къейдна.­

— Къенин мярекат СтIал Сулейманан район патал кьетIен вакъиайрикай сад я, — къейдна Н.Абдулмуталибова. — Чна ам Да­­­гъустандин халкьдин шаир СтIал Су­лей­ма­нан, цIудралди алимрин, шаиррин, къагьри­манрин чилел тухузва. Абурун ара­да Алкьвадар Гьасан эфендидин тухумдин векилри лайихлу чка кьазва: Абдусалам Гьуьсейнов,  Готфрид Гьасанов, Генрих Гьасанов, Амри Шихсаидов, алимар тир Хан­ме­гьамедовар ва масабур. Абур лезги халкьдин тарихда аквадай хьтин  гел тунвай­ кьегьалар я, — лагьана рай­ондин кьили.

Конференциядиз Къиргъизистандай хтанвай мугьманар тебрикдайла, Н.Абдулмуталибова октябрдин вацра Дагъустандин делегация а уьлкведиз фин, ана хьайи гуьруьшар рикIел хкана, и уьлкведа да­гъустанвияр стхавилелди, дуствилелди яшамиш жезвайди къейдна. Ада гьакIни Тойгонбай Абдыкаровазни Замир Ракиеваз “Шарвили” эпосдин суварик, Расул Гьамзатован 100 йисан юбилейдин мярекатрик хтун теклифна.

Алкьвадар Гьасанан ирсинин важиблувиликай рахадайла, ада алимдин зегьметрихъ (ктабрихъ) вири дуьнья патал еке метлеб ва гьа са вахтунда абуруз, дериндай ахтармишна, къимет гунин игьтияж авайди лагьана.

Энрик Муслимован фикирдалди, Кьасумхуьрел международный дережада аваз конференция тухун Алкьвадар Гьасанан ирс ахтармишунин карда нубатдин кам хьиз кьабулиз жеда. Ада къейд авурвал, алимдин къелемдикай хкатнавай шейэр Исламдин гзаф уьлквейра маш­гьур я, абуру мусурманрин илимда ла­йихлу чка кьазва.

Алкьвадар Гьасанан уьмуьрдикай ва яратмишунрин рекьикай гегьеншдиз Гьуьсейн Гьуьсейнова ихтилатна. Адан докладдай малум хьайивал, алимди неинки са мусурманрин, гьакIни светский илимрани вичин гел тунва. Гь.Гьуьсейнова Ал­кьвадар Гьасанан музей эцигунай РД-дин Халкьдин Собранидин депутат Имам Яралиеваз ва “Диван-ал-Мамнун” ктаб акъудунай Дагъустандин лайихлу муаллим, “Просвещение” фондунин регьбер Магьмуд Абдулкеримоваз сагърай лагьана.

Тарихдин вилик Алкьвадар Гьасанан лайихлувилерикай, акьалтзавай несилриз руьгьдинни ахлакьдин тербия гунин карда адан яратмишунрин ирсинихъ авай метлебдикай чпин рахунра Омар Гьуьсейнова, Мегьамед Ибрагьимова, Шамил Али­ханова, СтIал Сулейманан райондин имамрин Советдин председатель Гьасан Амаханова, тарихдин “Урусат — зи тарих” паркунин отделдин регьбер, “Алкадаридин гъетерин кIапIал” фильмдин автор Гуьлера Камиловади, шаир Сажидин Саидгьасанова, СтIал Сулейманан райондин образованидин управленидин малуматринни методикадин центрадин директордин заместитель Венера Абдуселимовади ва масабуру лагьана.

Тойгонбай Абдыкаровани Замир Ракиева конференциядин тешкилатчийриз чух­сагъул малумарна, Дагъустандикай чпин фикирар ва чпи Дагъустандинни Къиргъизистандин арада амадагвилин, дуствилин алакъаяр мягькем хьуниз итиж ийизвайди лагьана.

Конференциядин сергьятра аваз, видеоалакъадин куьмекдалди, РАН-дин ака­­демик Абдусалам Гьусейновни рахана.

Алкьвадар Гьасанан къамат эбеди аву­нин мураддалди, тешкилатчийрин къа­рардалди, СтIал Сулейманан райондин жуьмя-мискIин арифдардин тIвару­нихъ яна. Гуьгъуьнлай мугьманриз Ал­кьвадар Гьасанан тIварунихъ галай музейда итижлу сиягьат тешкилна.

Агьмед  Магьмудов