Ноябрдин эхирра Нижегородский областдин Кстово шегьерда, Виридуьньядин самбодин академияда, спортдин и жуьредай Россиядин Кубок къазанмишун патал акъажунар кьиле фена. Ана чи уьлкведин 50-дав агакьна регионрай тир 400-далай виниз спортсменри иштиракна…
Къейд авун лазим я хьи, къведай йисан мартдиз Москвада кьиле фидай дуьньядин Суперкубокдиз — “Самбодин бине эцигай ксарин мемориалдиз” (виликдай адаз Харлампиеван мемориал лугьузвай) хкядай пай тир и акъажунар лап къизгъин бягьсералди тафаватлу хьана. Кубокда СтIал Сулейманан райондин Алидхуьрелай тир, чи кIелзавайбуруз фадлай таниш Аслан Къурбановани иштиракна. 79 кг-дин заланвал авай спортсменрин арада чи ватандашди 3-чка кьуна. Гила ада вичин устадвал Суперкубок къазанмишун патал акъажунра къалурда.
РикIел хкин: Кьасумхуьрел самбодинни дзюдодин ДЮСШ ачухай ва ана жегьилриз вердишвилер гузвай стхаяр тир Къурбановрин тIварар спортдал рикI алайбуруз фадлай ва хъсандиз таниш я. ИкI, Рамазанни Тельман — спортдин международный классдин мастерар, пешекар спортсменрин арада дуьньядин чемпионар, Юрий азаддиз кьуршахар кьунай, самбодай ва дзюдодай спортдин мастер, СССР-дин ва РСФСР-дин чемпион, кесерлу хейлин турниррин гъалибчи я. Ю.Къурбанован хва Аслана бубадин ва имийрин рехъ баркаллудаказ давамарзава. Ам гзаф турниррин ва акъажунрин гъалибчи, гьа гьисабдай яз универсальный женгерай са шумудра Россиядин, гьакIни дуьньядин ва Европадин чемпионни я.
Рагнеда Рамалданова
