Чи ватанэгьлияр — гьар сана
Жуванбурукай са хъсан хабар агакьайла, заз гзаф шад жеда, рикI гьевесдив ацIуда. Ахпа хейлин вахт фида гьа хабардин таъсирдикай хкат тийиз. Гьа са вахтунда чIуру хабар агакьайла, жувазни пис жеда. Хайи халкь кIан хьун, сада-садаз куьмек гун, лезги чил, чIал хуьн — ибур, заз чиз, гьар са лезгидин везифаяр я.
Зун патарал хьана, зал дуьшуьш хьайи саки вири лезгияр гьахьтинбур тир, чпел дамахдайбур. И йикъара зун цавув агакьарай вакъиа хьана. Ам зи хуьруьнви, къунши Омаров Мегьарам Омаровичаз 2021-йисан 11-августдиз “Дагъустандин халкьдин игит” лагьай тIвар гунихъ галаз алакъалу тир.
Мегьарам Омаров 1963-йисан 12-августдиз Агъа Макьарин хуьре дидедиз хьана. Мегьараман дах Омар колхоздин чубан тир. ЦIийи Макьа кIвал-югъ кутурла ада школадин къаравулвиле кIвалахна. Мержан халани школада михьивилердайди тир. Халис зегьметчийрин хизанда 8 аял чIехи хьана, абурукай 3 — гадаяр. Вахтар дарбур тир. Къвезвай мажибралди хизан хуьз жезвачир. Гьавиляй Мержан халади вичин рушарихъ галаз гамар, халичаяр хразвай ва маса гузвай. Хсуси сала помидорар цазвай, гатуз Урусатдин шегьерриз тухвана, маса гудай. Гьа икI, абуру чпин кIвалер туькIуьрна, аялрив кIелиз туна, абуруз мехъерар авуна. 1980-йисуз ЦIийи Макьарин юкьван школа куьтягьай Мегьарам Рязандин областдин Песочнядин хуьруьн майишатдин техникумдиз гьахьна.
1982-1984-йисара жегьилди Чита областда армиядин жергейра къуллугъна. 1985-йисуз техникум куьтягьай гада Рязандин областдин “Заветы Ленина” колхоздиз агрономвиле рекье туна. Гъавурда аваз кIвалахзавай пешекар са тIимил вахтундилай майишатдин кьилин агрономвиле тайинарна.
1993-йисуз зи хуьруьнви Чучковский райондин “Родина” ТОО-дин председателвиле хкяна. 2005-йисуз Мегьарам Омаровича “Протасьева” тIвар алаз вичин ООО ачухна.
Протасьева хуьре Мегьарам Омаровича 1000 гектар чиле техилар цазва, къарамалар, лапагар хуьзва. Ада хуьруьн администрациядиз, райондиз спонсорвилин куьмекар гузва, урус халкьдихъ галаз хъсан алакъаяр хуьзва. Хуьруьн хейлин агьалийриз кIвалахдай чкаяр арадал гъанва. Райондин экономика вилик финик аквадай хьтин пай кутазвай агъамакьави 2008-йисалай Чуковский райондин собранидин депутат я.
1994-йисуз Мегьарам Омаровича Рязандин хуьруьн майишатдин институтни куьтягьна.
Мегьарам Омаровича 4 лезги хизан вич авай чкадиз тухвана, абуруз кIвалахдай, гьана кIвал-югъ кутадай мумкинвал гана.
ЦIийи Макьарин хуьре шегьредин патав М.Омарова вичин стха Рагьимхадиз кьве гьавадин лап чIехи туьквен эцигизни куьмекна.
Мегьарам Омаровичаз пуд велед ава, виридаз кьилин образование ганва. Абурни хъсандиз яшамиш жезва.
Чан сагърай зи хуьруьнвидин, мадни агалкьунар хьурай адахъ!
Масуб Магьмудов,
отставкада авай полковник
