Энрик  Муслимов,

Дагъустан Республикадин милли сия­сат­дин ва динрин крарин рекьяй министр:

— Дагъустан Республикадихъ медениятдин девлетлу ирс ава. ЧIехи бубайрилай агакь­на­вай ва вичихъ еке тарих авай и ирс дагъвийри руьгьдин аманат хьиз хуьзва. Ви­ри­ дуьньядиз машгьур хьанвай “Лезгинка” кьуьл, жуьре­ба-жуьре сеняткарвилер, халкьарин яратмишунар, музыкадин искусство, милли чIа­лар… И сиягь мадни давамариз же­да.

“Лезги газетдин” 100 йис тамам хьанва. И девирда ада Дагъустандин меденият вилик тухуник, халкьарин арада дуствал мягькема­руник, хайи чIал хуьник кьетIен пай кутунва­, кутазва. Вири девирра хьиз, къенин юкъузни “Лезги газетди” хайи чIал хуьн ва ам вилик тухун вичин асул везифа яз тайинарнава. И кардив редакциядин коллектив къайгъударвилелди, жавабдарвилелди эгечIни ийизва.

За “Лезги газетдин” редакциядин коллективдиз 100 йисан юбилей рикIин сидкьидай мубаракзава. Къуй чи милли прессадин майданра зегьмет чIугвазвай журналистрихъ чан­дин сагъвал, яргъи уьмуьр, яратмишунра агалкьунар хьурай!

Заур  Эминов,

Дагъустан Республикадин чилин ва эменнидин алакъайрин министр:

— Гьуьрметлу редакция! “Лезги газетдин” 100 йис тамам хьунихъ галаз алакъалу яз чи тебрикар кьабула.

Газетдин 100 йис тамам хьун — им редакциядин къуллугъчийрин, кIелзавайбурун, штат­дик квачир мухбиррин, печатдин хилен ветеранрин, къелемдин юлдашрин, вири халкьдин сувар я.

И йисара “Лезги газетди” еке мензил атIанва. Девиррихъ галаз кам-камуна аваз физвай газетда гзаф дегишвилерни кьиле фена. Къе адахъ вичин хсуси хатI ава ва ам халкьдин рикI алай газет я. Квез дурумлу зегь­метдай мад сеферда сагърай лугьузва.

Чи мурад газетдин редакциядин коллективдихъ яратмишунрин рекье мадни еке агалкьунар хьун я. Къуй газетди цуьк акъудрай, кIелзавайбурал малуматар агакьарунин карда Аллагьди квез къуватар гурай!

Осман  Абдулкеримов,

“Ахцегь район” МР-дин кьил:

— “Ахцегь район” муниципалитетдин коллективди, райондин собранидин депутатри республикадин “Лезги газетдин” редакциядин журналистриз 100 йисан юбилей рикIин сидкьидай мубаракзава!

Лезги халкьдин милли журналистикадин бине вичин вахтунда “ЦIийи дуьнья” (гила “Лезги газет”) газетдилай къачунал ва адан сад ла­гьай редактор баркаллу ахцегьви, Дагъустанда филологиядин илимрин сифте кандидат­ Гьажибег Гьажибегов хьунал чна дамахзава.

100 йис — тамам асир, чIехи девир я. И де­вирда багъри “Лезги газетдикай”, гьар садан кIвализ къвез, чи тарих, милли чIал, меденият вилик тухунин, инсанрин савадлувал, марифатлувал ва гражданвилин къанажагъ арадал гъунин локомотив хьана.

Инсанрин фикир-къанажагъ лазим патахъ элкъуьрун патал 4-власть тир СМИ-рин такьат­рин куьмекдалди дуьньяда идеологиядин дяве къвердавай къизгъин жезва. Ихьтин шартIара къарши идеологиядин хура акъвазун патал хайи чIалал акъатзавай “Лезги газетдин” везифа-роль мадни артух я. Лезги хуьрерани районра, республикада, гьакI уьлкведани адалай къецепата кьиле физвай уьмуьрдин важиблу вакъиайриз дикъет гуз, абурукай халкь хабардарзавай ва бубайрин баркаллу краралдини чи йикъарин хъсан чешнейралди акьалтзавай несил ватанпересвилин, зегьметкешвилин руьгьдаллаз тербияламишиз алахъзавай куьн, редакциядин коллектив, пара кьадар сагърай!

Шадвилин гьалара газетдин 100 йис къейдун, адаз талукь яз газетдин тарихдин махсус ктаб акъудун — им неинки са редакциядин, гьакI вири лезги халкьдин еке дережа — агалкьун я. И девирда чи милли публицистикади гьакъикъатдани четин ва лайихлу рехъ атIанва. Халкьдин гуьзгуь, тарихчи ва камаллу меслятчи яз, ада, алатай асирдин 20-йисарилай эгечIна, къенин йикъалди экономикадин, яшайишдин, культурадин — саки вири рекьерай чун виликди физвай камар, гьакI кими-эксик къалурзава, нукьсанар туькIуьр хъийидай рекьер тайинарзава.

Мегьамед  Шамилов,

“Докъузпара район” МР-дин кьил:

— Гьуьрметлу ватанэгьлияр! Милли прессадин къуллугъчияр, яратмишзавай интеллигенциядин векилар!

Малум тирвал, алай йис чи милли медениятдин тарихда “Лезги газетди” къейд авур 100 йисан юбилейдалди лишанлу жезва. Шак алач, чи халкьдин къанажагъда, милли суй арадал атунин карда, акьалтзавай несил ватанпересвилин руьгьдаллаз тербияламишунин жигьетдай газетдал кьилин кар ала. И рекье чаз “Лезги газет” асирдин рехъ атIузвай чи сеферчи ва куьмекчи яз хьана, къенин юкъузни гьакI я.

РикIел хкана кIанда, лезгийрихъ инкъилаб гъалиб жедалди чпин милли кхьинар ва пресса авачир. Савадлу ксари туьрк чIа­лал­ди акъат­завай “Шура Дагъустан”, “Дагъустан­ фукъа­ра­сы” газетрикай хийир къачузвай. Ах­па 1922-1924-йисара Ахцегьа “Жегьил Са­мур­ви”, “Самур фукъарасы” газетар туьрк чIа­­­лалди акъа­тиз­ хьана. Чи баркаллу хва, про­светитель Гьажибег Агьмедханович Гьажибегован алахъунар себеб яз 1928-йисан­ ­21-июлдилай “ЦIийи дуьнья” газет лезги чIа­лалди акъатиз башламишна.­

“Лезги газетдин” 100 йисан юбилейдин къаршида Докъузпара райондин мухбиррини газетдин уьмуьрда кьетIен роль къугъвана. Хайи районда кьиле физвай гьерекатрикай, вакъиайрикай, цIийивилерикай чкадин мухбирар тир Сабир Агъаметова, Шихнесир Къафланова, Нариман Магьманова, Шагьбала Шагьбалаева ва масабуру таза хабарар агакьариз хьана. И кар къенин юкъуз мухбир­рин цIийи несилди агалкьунралди давамарзава.

Гьуьрметлу “Лезги газетдин” редакция! Чна Квез газетдин 100 йисан лишанлу юбилей ри­кIин сидкьидай мубаракзава. Къуй ред­колле­гиядин работникрин, къуллугъчийрин, яратмишзавай интеллигенциядин къеле­мар мадни­ хци хьурай!

Замир  Азизов,

“Кьурагь район” МР-дин кьил:

— Гьуьрметлу Мегьамед Ибрагьимович! Гьуьр­метлу “Лезги газетдин” редакциядин коллектив! Кьурагь райондин агьалийрин ва зи патай багъри газетдин 100 йис хьун мубаракрай!

Девирдихъ галаз къуьн-къуьне туна кIва­лах­завай коллективдихъ кьилин редактор Мегьамед Ибрагьимов кьиле аваз аквадай агалкьунар авайди малум я. Газетдихъ галаз­ чи халкьдин сих рафтарвал авайди садазни сир туш. Ам жемят патал гзаф рекьерай куьмекчидиз элкъвенва. Мисал яз, газет кIелза­вайбуру бязи месэлайрай чпиз куьмек герек хьайила, газетдиз чарар рекье твазва. Абурун суалризни газетдин чинрилай кьил-кьилел алай жавабарни хгузва. Ихьтин алакъади газетдиз халкьдин патай авай ихтибар мадни артухарзавайдал шак алач.

Къе гьар сада интернетдин такьатрикай  менфят къачузвай вахтунда “Лезги газетдин” ти­раж виле акьадайвал агъуз аватнавач. Да­гъустандин хайи чIаларал акъатзавай газетрин арада, тираждал гьалтайла “Лезги газет” 1-чкадал хьун — им вири халкьдин агалкьун я.

Газетдин редакцияди интернетдин майданрани гегьенш кIвалах тешкилнава. Мисал яз, “Фейсбукда”, “Инстаграмда”, “Телеграмм­да” ва интернетдин маса майданра хайи чIа­лал­ марагълу макъалаяр, шикилар чапзава. Маса уьлквейра, регионра яшамиш жезвай чи ватанэгьлийрихъ галазни сих алакъа хуьн — им­ни хъсан кIвалахрикай сад, гьелбетда, га­зет­дин редакциядин бажарагълу коллективдин гьунар я.

Хайи чIал хуьнин, халкь сад авунин карда кьетIен чка кьунвай “Лезги  газетди” эконо­мика­дин, мергьяматлувилин, Дагъустандин хал­кьа­­рин садвилин, медениятдин, спортдин, илим­дин, сагъламвилин месэлайризни фикир гузва, и темайрай газетда хъсан макъа­лаяр чапзава.

Чаз чи халкьдин тIвар алаз акъатзавай газетдин кукIушар мадни кьакьан, районрин газетрин даях тир “Лезги газетдин” редакциядин коллективдихъ кIвалахдин рекье чIехи агалкьунар хьана кIанзава.

Фарид Агьмедов,

“Мегьарамдхуьруьн район” МР-дин кьил:

— Играми “Лезги газетдин” редакциядин коллектив!

За кьилди жуван, Мегьарамдхуьруьн рай­ондин администрациядин ва вири агьалийрин патай квез “Лезги газетдин” 100 йис тамам хьун рикIин сидкьидай мубаракзава! Газет арадал гъизвайди ва адакай вири жемиятдин даях ийизвайди редакцияда зегьмет чIугвазвай инсанар я. И карди квевай сифте нубатда халкь, чIал ва хайи чил кIан хьун истемишзава.

“Лезги газетдин” чинриз лезги халкьдин тарихдиз, медениятдиз, чи чIехи бубайрин адетриз талукь гзаф кьадар макъалаяр акъат­зава. Абурун куьмекдалди кIелзавайди виш йисаралди арадал атанвай чи милли къанажагъдихъ галаз таниш жезва.

Са шакни алачиз, “Лезги газетдин” яратмишдайбурун коллективди хайи чIал ва ме­де­ниятдин ирс хуьнин кардик еке пай кутазва.­

Йисалай-суз газетди кIелзавайбурун арада итиж хкажзава ва и кар себеб яз кIелза­вайбурун, редакциядихъ галаз алакъа хуьзвайбурун кьадарни артух жезва. Рекъемрин технологияр, интернет вилик фенвай девирда хайи чIалал акъатзавай газет гуьгъуьна акъвазнавач, аямдин цIийивилерихъ галаз кам-камуна аваз физва.

Заз “Лезги газетдин” редакциядин коллективдихъ яратмишунрин рекье мадни еке агалкьунар, чандин сагъвал хьана кIанзава. Гьар са карда квевай чи куьмекдикни умуд кутаз жеда.

Нариман Абдулмуталибов,

“СтIал Сулейманан район” МР-дин кьил:

— Гьуьрметлу “Лезги газетдин” редакциядин коллектив! За квез баркаллу юбилей — «Лезги газетдин» 100 йис тамам хьун — рикIин сидкьи­дай мубаракзава.

Баркаллу 100 йисан къене «Лезги газетди» чи халкьдиз вафалудаказ къуллугъзава. Кьуд патай кIватIиз, кьайдада тваз, жемятдив вахт-вахтунда хабарар, малуматар агакьарзава. Лезги эдебият, меденият, яшайиш девирдин дегишвилерихь галаз кам-камуна аваз вилик тухуник газетди кутазвай пай тарифдиз лайихлуди я. Гьавиляй, кьетIен гьуьрмет авунин лишан яз, халкьди адаз вичин хсуси тIварни ганва.

Газет дидед чIал, культура ва бубайрин адетар хуьн ва вилик тухун патал гьамиша женгинин сифте жергейра аваз хьана. Газетдин чинра жегьил шаиррини прозаикри чпин къелемар ахтармишна, абур газет себеб яз  яратмишунрин шегьредал экъечIна. Хъсан насигьатчиди ва камаллу арифдарди хьиз, газетди жегьил кIелзавайбур хайи халкьдин лап хъсан адетралди тербияламишуник, ватанпересвал хкажуник еке пай кутазва. Халкьдин сивин яратмишунар кIватI хъувуналди ва абур раиж авуналди, газетдикай халкьдин камалдин хазина, литературадин чIал вилик финин чешме, хейлин машгьур пи­са­те­лар, шаирар, алимар, культурадинни искусстводин деятелар патал устадвал хкаждай халисан школа хьана.

“Лезги газетди” вичин тарихда цIийи асирдиз кам къачунва. Девирар къвез физва, уьмуьрда гзаф дегишвилер ийизва, абурухъ галаз, гьелбетда, газетни дегиш жезва. Амма алатай 100 йисан баркаллу тарихдин ирс, къеледин хандакI хьиз, гьамиша куь бинеда амукьдайдал  шак алач.

ТIварар са шумудра дегиш хьанатIани, “Лезги газетди” вичин кьилин къайда — гузвай материалрин дуьзвал ва жемят патал менфятлувал — садрани дегишарнач. Вичин 100 йисан тарихда “Лезги газет” Дагъустан Респуб­ликада гьамиша таъсиблу, кIелдай­бу­ру пара хушдаказ кьабулзавай изданийрин жергеда хьана. Шадардай кIвалах ам я хьи, и ли­шанлу шикил къени давам жезва: республикада акъатзавай милли газетрин ара­да “Лезги газетдин” тираж виридалай чIехиди я. И карди мад сеферда халкьдин патай багъри газетдиз авай гьуьрмет ва кIанивал къалурзава.

За “Лезги газетдин” коллективдиз ва кIел­завайбуруз баркаллу юбилей — газетдин сад лагьай нумра акъатайдалай инихъ 100 йис тамам хьун мад сеферда рикIин сидкьидай мубаракзава. Къуй куь рекьер мадни гьяркьуь, къелемар мадни хци хьурай! Къуй «Лезги газет» мадни чIехи дережайрив агакьрай!

«Лезги газет»