Аскер-интернационалист Абдул Саидован тIварунихъ галай Эминхуьруьн юкьван школада хъсан къиметар аваз кIелзавай, школадин ва райондин школьникрин мярекатра активвилелди иштиракзавай аялар гзаф ава. Ихьтинбурукай яз завай 5-классдин ученик Гьамидов Мегьамедсаламан (шикилда) тIвар кьаз жеда.
— Мегьамедсалам гьам кIелунин, гьам ахлакь-низамдин рекьяй гзафбуруз чешне я, — лугьузва школадин директор Рагьман Османова. — Ада алай йисуз лезги чIалан йикъан сергьятра аваз райондин школьникрин арада шиирар кIелунай тухвай конкурсдани кIвенкIвечивал къачуна. Мегьамедсалам мергьяматлувилин “Умуд” фондунин патай Гьуьрметдин грамота ва 5000 манатдин кьадарда аваз пулдин приз гуниз лайихлу хьана. Ихьтин кIелзавайбурал школадин муаллимри дамахзава.
М. Гьамидова вичин алакьунар школада тухузвай олимпиадайра, конкурсра, КВН-дин къугъунра, спортдин акъажунрани къалурзава. Идан гьакъиндай школадин руководстводин патай Мегьамедсаламаз ганвай грамотайри шагьидвалзава.
Мегьамедсаламан рикI ктабар кIелунал гзаф ала. Ам гьам хуьруьн, гьамни школадин библиотекайрин активный кIелзавай-бурукай сад я.
— Райондин Алкьвадар Гьасан эфендидин тIварунихъ галай центральный библиотекадин къурулушда тухузвай культурадинни литературадин мярекатрани Мегьамедсалама активнидаказ иштиракзава, — лугьузва Эминхуьруьн библиотекадин заведующий Алла Буржалиевади. — Алай йисуз, Етим Эминан, Фейзудин Нагъиеван яратмишунриз ва лезги чIал хуьниз талукьарна, хуьруьн библиотекада тухвай мярекатрани Мегьамедсалама шиирар кIелна, грамотаяр къачуна.
М. Гьамидован шикил школадин Гьуьрметдин доскада ава.
Хазран Кьасумов
