И йикъара чав чIулав хабар агакьна: яргъал йисара Мегьарамдхуьруьн райондин Ярагъ-Къазмайрин хуьре яшамиш хьайи лезги хва, халкьдин хийирлу гзаф крарин кьиле акъвазай, абур виликди тухуз, вири жуьрейрин мумкинвилер жагъуриз хьайи общественно-политический деятель, Дагъустандин лайихлу экономист, Дагъустандин муршид, шейхерин шейх Ярагъ Мегьамедан фондунин председатель Гьажибуба Шихмурадович Рустамов рагьметдиз фена.
Гь.Ш.Рустамов 1937-йисан 3-сентябрдиз Мегьарамдхуьруьн райондин Ярагърин хуьре дидедиз хьана. Школа куьтягьна, ам Хасавюртдин хуьруьн майишатдин техникумдиз гьахьна. Анаг яру дипломдалди акьалтIарна, Дагъустандин хуьруьн майишатдин институтда бухгалтер-экономистдин пешедай кIелунар давамарна.
1970-йисалай ада вичин вири уьмуьр чи республикадин экономика виликди тухунин кардиз багъишна. Хейлин йисара республикадин Госагропромда, хуьруьн майишатдин министерствода жавабдар къуллугъар бегьемарна.
Алатай асирдин 80-90-йисара Гь.Рустамовакай вичин Мегьарамдхуьруьн районда “Магарамкентский”, ва “Яру гъед” совхозрин директор хьана. Бажарагълу тешкилатчиди а майишатар чешнелубуруз элкъуьрнай, хуьрерин яшайишни гьакьван виликди тухванай.
1997-йисалай Гь.Рустамов ял язавай. Амма халкьдин ва обществодин хийирлу краривай ам къерех хьанач. Хейлин йисара адакай РСФСР-дин Верховный Советдин депутат Сабир Къехлерован куьмекчи хьана. Гьа йисара ада Докъузпара район арадал хкуник, арандин чилер дигидай целди таъминардай Самурдин акведук туькIуьрунин кардик пай кутуна.
Лап еке кIвалах ада Ярагъ Мегьамедан ирс чи несилрив ахгакьарун патал тухвана. Ярагъ-Къазмайрин хуьре чIехи муршиддин юбилей тухунин, ана мавзолей ачухунин, муршиддин сур авай Гуниб райондин Сугъратл хуьруьхъ галаз Ярагъ-Къазмайрин хуьруьн стхавилинни хванахвавилин алакъаяр тайинарунин, Ярагъ Мегьамедан ирс — адан гъилин кхьинар чапдай акъудна, халкьдив ахгакьарунин ва маса крариз вичин вири мумкинвилер багъишна.
Рагьметлудан рикIик хъийидай крар гзаф кумай, амма ажал инсафсуз я. Чна рагьметлудан хизанриз, мукьва-кьилийриз, дериндай хажалат чIугунивди, башсагълугъвал гузва. Гьажибуба Шихмурадович Рустамован экуь къамат чи рикIелай садрани алатдач.
“Лезги газетдин” редакциядин коллектив.
