И йикъара чав пашман хабар агакьна: Дербент шегьерда, бедбахтвилин дуьшуьшдик акатна, пудкъад йисалай виниз вичин уьмуьр акьалтзавай несилдиз чирвилер, тербия гуниз бахш авур муаллим, милли эдебиятдал, чIалал рикI алай, инсанриз гзаф хъсанвилер авур камаллу усави агъсакъал Гьамзат Мегьамедгьадиевич Юсупов 85 йисан яшда аваз рагьметдиз фена.
Гь. Юсупов 1936-йисуз Кьурагь райондин Усарин хуьре къуллугъчидин хизанда дидедиз хьана. Аялвал Ватандин ЧIехи дяведин йисарал ацалтай Гьамзатаз каш-мекьни, дердисервилерни, зегьметдин “дадни” акуна. Адаз тамамдиз я аялвал, я жаванвал акунач. Сифтегьан школа хуьре, ирид лагьай класс Гелхена куьтягьай гадади 8-9-классар Тпигъа кIелна. 18 йис хьайила, дахди адаз мехъерарна. Са йисалай (1955-йис) жегьил Советрин Армиядиз тухвана. Ина адан кьилел гуьзлемиш тавур дуьшуьшарни, агьвалатарни атана.1956-йисан зулуз аскер Венгриядин вакъиайрин иштиракчи хьана, ягъ-ягъунрик акатайла, Гьамзатан кьилихъ гуьлле яни, снаряддин кIус яни галукьна. Ам вич вичел алачиз Ватандиз хкана. Са шумуд вацра госпиталра кьилин къалпагъ сагъар хъувурла, Юсупов кIвализ ахъай хъувуна. Ам викIегьдиз уьмуьр давамарунив, хизан хуьнив эхгечIна. Хуьруьн библиотекадани кIвалахиз, Дагъустандин госуниверситетдин тарихдин факультет акьалтIарна. Ахпа юридический факультетни куьтягьна.
Гьамзат Юсупова кьве йисуз Квардалрин, ахпа Укузрин хуьруьн, кьве йисуз Аладашдин школайра кIвалахна. Ахпа Маллакент (Арабляр) хуьре кIвал-югъ кутуна. Инани педагогвилин кIвалах давамарна. Дербентдин социально-педагогвилин университетдани студентриз тарихдай, праводай лекцияр кIелна. Гьакъисагъвилин кIвалах Дагъустандин Верховный Советдин Президиумдин, ВЛКСМ-дин Дагъустандин обкомдин гьуьрметдин грамотаяр, Соцсоревнованида гъалиб хьайивилин знак гуналди къейдна.
Уьмуьрдин юлдаш Къизбикедихъ галаз ада бахтлу уьмуьр кечирмишна, ва цIуд аялдиз зегьметдин, ахлакьдин дуьзгуьн тербия гана. Аллагьдин патай шаирвилин пай ганвай касди кьилди амукьай легьзейра рикIяй къвезвай цIарар шиирриз элкъуьрна ва “Балайриз пишкеш” тIвар алай ктабни акъудна. Кьвед лагьайдини гьазурнавай Гьамзат муаллимди, амма туькьуьл дуьшуьшди вири кьулухъ яна. Гьамзат муаллимдин экуь къамат ам чидайбурун рикIера гьамиша амукьда.
Чна чи газетдин дуст, умудлу даях, Махачкъала шегьердин Советский райондин администрациядин кьилин заместитель Сабир Гьамзатовичаз ва вири багърийриз, мукьва-кьилийриз, дериндай хажалат чIугунивди, башсагълугъвал гузва.
“Лезги газетдин” редакциядин коллектив.
