2-ноябрдиз Госдумадин депутат Хизри Абакаров къадим Дербент шегьердин цIийикIа туьхкIуьр хъийизвай кьилин майдандиз килигна. Проектдин бинедаллаз, анал неинки шадвилин мярекатар тешкилдай, гьакIни ял ядай чкаяр, гъвечIи кафеяр, туристар патал ачух террасаяр галай центраяр, амфитеатрдин ачух сегьнеяр пайда жеда.

Майдандал В.И.Ленинан гуьмбет алай чкадал дегь девирра Пак Георгийдин Собор (килиса) алай. Инаг Дербент шегьерда авай хашпарайрин кьилин ибадатхана тир. Ам 1938-йисуз чукIурнай. И килисадин бинейрин винел пад гила махсус гуьзгуь туна кIевда.

Дербент шегьердин кьилин архитектор Иса Агьмедова суьгьбет авурвал, сиф­тедай килисадин цларин бинеяр ­жа­гъурун патал эгъуьнунин кIвалахар башламишнай. И вахтунда генани къадим де­вирдин археологиядин объект винел акъатна. Аквадай гьаларай, жа­гъанвай тарихдин шагьид са девлетлу савдагардин кIвал тир. И кардин гьакъин­дай яд ту­хун патал ишлемишзавай гунгари, куьгьне пичини ва винел патан акун­рай ХI-ХII асиррин дараматдин бинейрин амукьайри шагьидвалзава. И объектни ви­нелай махсус гуьзгуьдалди кIевдайвал я.

Майдандал мад кьве павильонни эцигзава. Абурукай сада туристрин центр ва археологиядин объектар къалурдай майдан, муькуьда капI ийидай кIвалер ва санузелар жеда. Майдандин сергьятра гъвечIи кафейрини кIвалахда.

Кьилин майдан цIийикIа туькIуьр хъувунин кIвалахар 2022-йисан эхирра куьтягьдайвал я.

Къагьриман  Ибрагьимов