СтIал Сулейманан райондин Курхуьрел ва НуьцIуьгъа “Шегьердин къулай шартIар тешкилун” программадин сергьятра аваз аваданлу авунвай кьве майдан ачухна. И вакъиадиз талукьарнавай мярекатда райондин кьил Нариман Абдулмуталибова, адан заместителри, райондин ва хуьрерин депутатри, чкадин агьалийри ва масабуру иштиракна.
Скверрин къайдада туькIуьрнавай майданра ял ядай, аялар къугъвадай чкаяр ава, къелемар цанва, чиле плитаяр тунва. Чкадин агьалийри чпиз ихьтин къулайвилер тешкилунай райондин кьиле авайбуруз сагърай лагьана.
Мукьвара Цицикрин хуьрени аялар къугъвадай махсус майдан кардик акатна. Райондин администрациядин пресс-къуллугъди хабар гузвайвал, ам “Чкадин теклифар” проектдин сергьятра аваз туькIуьрнава.
Алай вахтунда государстводин “Хуьруьн мулкар вилик тухун” программадин сергьятра аваз Эминхуьруьн цIийи микрорайондиз газ тухузва. СтIал Сулейманан райондин администрациядин пресс-къуллугъди хабар гузвайвал, и микрорайон 1990-2000-йисара арадал атана. Ана 400-лай артух кIвалер ава. Икьван чIавалди ина яшамиш жезвай агьалийри чпин къуватралди ва хуьруьн администрациядин куьмекдалди тухванвай газдикай менфят къачузвай. Гзаф кьадар турбаяр хатасузвилин къайдайрал амал тавуна тухванвай. Газ агакь тавунвай кIвалерни амай.
Микрорайондиз газ тухунин кIвалахрив алай йисан сентябрдиз гатIуннава ва декабрдин эхирралди акьалтIардайвал я. Пудратчи карханадин везифаяр “Нефтекумское СМУ” ООО-ди тамамарзава.
«Лезги газет»
