Алатай гьафтеда Мегьарамдхуьруьн райондиз РД-дин энергетикадин ва ЖКХ-дин министрдин везифаяр вахтуналди тамамарзавай Ризван Мурадов мугьман хьана. “Лезги газетдиз” министерстводин пресс-къуллугъди хабар гайивал, Ризван Мурадов, адан сад лагьай заместитель Эфенди Хайдакьов, РД-дин “Дагсельхозстрой” ГКУ-дин директордин заместитель Гитиномегьамед Абдуллаев Мегьарамдхуьруьн райондин кьил Фарид Агьмедовахъ галаз санал муниципалитетдин инженерный инфраструктурадин объектар авай гьалдихъ галаз таниш хьана.
Кьилди къачуртIа, меркездай атанвай мугьманри цин “Чепелар-Гилияр-Къуйсун” турба авай гьал ахтармишна. Чкадин агьалийрин гафаралди, и объект лап куьгьне хьанва, гьавиляй мукьвал-мукьвал турбадай тIеквенар акъатзава. Цин турба кьилдин ксарин саларай тухванвай чкаярни, ам пад хьайитIа, яшайишдин кIвалер цик акатунин хаталувал ава.
Месэла гьялун патал райондин администрациядиз цIийи водоводдин проект ва герек тир маса документар гьазурун теклифна. Идалайни гъейри, пис гьалда авай саки 300 метрдин мензилда турба полиэтилендиндалди эвезда ва ам яшайишдин кIвалер эцигзавай мулкарилай къецяй тухуда.
«Лезги газет»
