РФ-дин СК-дин РД-да авай Силисдин управлениди «Лезги газетдиз» хабар гайивал, Кьурагь райондин КIирийрин хуьряй тир мешебеги Зейнудин Батманован къанлудиз 19 йис кар атIана. Силисдин органри кIватIнавай субутдин делилрал асаслу яз, Нариман Башировак РФ-дин УК-дин са шумуд статьядай (къанунсуз яракьламиш хьанвай тешкилатда иштиракун, къанун-къайда хуьдай органрин къуллугъчийриз къаст авун, сад ва адалай артух инсанар кьин… вири санлай, 16 статья) тахсиркарвал кутуна.
Кар атIанвайди 2011-йисуз террористрин «Южная» дестедик экечIна. Кьве йис арадай фейила адакай чIехи тахсиркарвилерин иштиракчи хьана. Ада ва адан терефдарри Табасаран райондин Хучни хуьре теракт, Дербент районда авай «Джемикентский» постунал хъиткьинарун арадал гъана, Дербентдин полициядин отделенидиз гуьлле гана. «Южная» дестеди авур виридалайни чIехи тахсиркарвилерик мешебеги Зейнудин Батманов гуьлле гана кьинни акатзава.
Н.Баширова, «ракьара» гьатайдалай кьулухъ силисдин органрихъ галаз сих алакъа хвена. Нетижада винидихъ тIвар кьунвай дестедин башчияр, амай иштиракчияр вужар ятIа тайинариз алакьна. Къейд ийин хьи, абур вири къанун-къайда хуьдай органри 2016-йисан гатуз кьиле тухвай махсус операциядин вахтунда тергна.
Н.Башироваз жаза гудалди, судди ва силисди 300-дав агакьна шагьидривайни зиян хьайи ксаривай хабарар кьуна. Уголовный делодин кьадар 100 томдикай ибарат тир.
РикIел хкин, Зейнудин Батманова 2015-йисан 15-майдиз террористрин есирда гьатнавай хизан азад хъувун патал хсуси чан къурбанднай. Бандитри адаз чпин дестедихъ галаз алакъа хуьн, Кьурагь райондин ОВД-дин начальникдиз зенгна, оперативный дестени галаз, тамун уьруьшдиз эвер гун буйругъна. Амма Зейнудин Батманова абурун тIалабунар кьилиз акъуднач.
Игитвилелди телеф хьайи хциз гьукуматдин шабагь (награда) гун патал ФЛНКА-дин руководстводи, Дагъустандин халкьдин тIварунихъай Халилбег Халилбегова РФ-дин Президент В.Путинан тIварцIел махсус чарарни рекье тунай. Амма кьегьалдив лайихлу шабагь гьа къени агакьнавач. Зейнудин Батманован жуьрэтлувилиз къимет гудайдак чна умудар кутазва.
