29-майдиз Москвада Лезгийрин милли культурадин федеральный автономиядин (ФЛНКА) V Съезд кьиле фена. Мярекатдин сергьятра аваз ФЛНКА-дин президент Ариф Керимова Съезддин иштиракчийрин вилик доклад авуна. Идалай гъейри, контрольно-ревизионный комиссияди автономиядин финансринни майишатдин рекьяй гьахъ-гьисабни кьуна.

ФЛНКА-дин сайтди хабар гузвайвал, Съезддин делегатри эхиримжи вад йисуз автономияди кьиле тухванвай кIвалахриз еке къимет гана ва вилик квай вад йисан девирда тешкилатдин регьбервиле Ариф Керимов хкя хъувун теклифна. И теклиф вирида рейсадвилелди кьабулна.

Къейд ийин хьи, мярекатда лезги халкьдин машгьур векилри, общественный ва политический деятелри, алимри, писателри, журналистри, лезгийрин Россиядин жуьреба-жуьре регионра авай милли тешкилатрин регьберри ва масабуру иштиракна. Съездал лезги чIал, культура, адетар хуьниз ва еримлу авуниз, миллетдин садвилиз, Лезгистан аваданлу авуниз талукь ва маса месэлаяр веревирдна.

«Лезги газет»