Ингье чун алай вахтунда уьлкведа, гьа гьисабдай яз Дагъустандани, инсанар ковид азардикди начагъ хьунин нубатдин “лепе” хкаж жезвайвиляй кIвалера амукьуниз мажбур хьанва. Республикадин Роспотребнадзордин Управленидин кьил Николай Павлова алатай вацран эхирриз региондин регьбер Сергей Меликован гуьзчивилик кваз республикада коронавирусдин вилик пад кьунин жигьетдай кардик квай Оперштабдин нубатдин заседанидал къейд авурвал, эхиримжи гьафтейра виридалайни гзаф начагъбур авай районрин жергедай яз Мегьарамдхуьруьн, СтIал Сулейманан, Хив районрин, Дербент шегьердин тIварарни кьуна. ТIугъвал секин жезвач, белки, ­чнани ам секин хьун патал чалай алакь­дай вири крар ийизвачтIа?!..

Заз залан тIугъвал пайда хьайи сифте вахтар мад сеферда рикIел хкиз кIанзава. Садбуру ам авайди туш, муькуьбуру “чун кIвалера тунихъ” маса себебар ава лугьуз наразивалзавайди тир. Амма, гьайиф хьи, гуьгъуьнлай гзафбур начагъ, бязибурун багърияр, танишар кьейи дуь­шуь­шар хьайила, тIегъуьндин фендигарвилин гъавурда акьунай. Амма гьакI ятIани эхирдалди инсанри азардин чIуру нетижаяр аннамишзавач. Уьлкведин кьиле авайбуру кьабулзавай серенжемар, кьилди къачуртIа, азардиз акси раб ягъуникай кьил баш­танзавайбурни гьалтзава… Йисан сифте кьилерай чи га­зет­дин редакциядин коллективдин чIе­хи паюни­ рапар яна. Абурун арада­ кьилин рекдактор М.Ибрагьимов, адан за­мес­титель К.Ферзалиев, жа­вабдар секретарь Ш.Ших­мура­дов, литературадин ва сиясатдин отделрин редакторар — М.Жалилов, Н.Ибра­гьимов,  секретариатдин мухбир Ш.Гьажимир­зоев, кьилин бухгалтер Р.Кадучева, кассир М.-С.Казимова ва мсб. ава. Заз лугьуз кIанзава, чи сагъламвал гзаф вахтара чалайни аслу я. Жу­ваз­ чиз-чиз чIуру кардин тереф хуьн дуьз туш. Аллагьдиз шу­кур хьурай! ­Заз чидай ксарикай азардиз акси раб яна, чIуру нетижаяр арадал атайбур, я та­хьайтIа азарлу хьайибур авач.

Кьилди закай рахайтIа, Дербентда хьайи мехъерилай кьулухъ чи ви­ри хизан азарлу хьана. Духтуррин­ га­фаралди, чун начагъ хьанвайди кьезил жуьре тир, стIалжемди жи­герриз ганвай зиянни тIимилди ( 7-10%) тир, амма азарди гайи азабриз завай “кьезилбур”  лугьуз жедач. Гьаниз килигна, за жуван­ багърийриз азардиз акси раб ягъун меслят къалурна. Дидеди — СтIал Су­лейманан райондин ЦБ-да, амай багърийрини чеб яшамиш жезвай чкайрин медицинадин идарайра рапар яна.

Зи багъри са кас азарлу яз, республикадин клиникадин азарханада, инсанри лугьузвайвал, “цен­трал­када” къатканвай. “Яру зонадиз” са касни ахъайзавачирди виридаз чида. Герек затIар авай пакет аниз рекье тунвайтIани, рикI секин туширвиляй, зак кIвализ хъфиз та­ди квачир. Гьаятда куьсридал ацукьнавай рушан вилер, адан гафар къени, адалай инихъ са шумуд варз алат­наватIани, зи рикIяй акъатзавач…

Р.Рамалданова