— Зи къунши дишегьли ковид азар кваз Махачкъалада, Редукторный посёлокда авай шегьердин 1-нумрадин азарханада къатканвай. Ам аниз вахтунда агакьнавай. Адан гьал писзавачир. Духтуррини “кичIе жедай кар авач”,- лугьуз, секинарзавай.
— Зун авай палатада 4 дишегьли авай, — суьгьбетна ада и мукьвара, ам сагъ хъхьана са кьадар вахт алатайла, чун, къуншияр, адан патав фена. — Зи гьал пис тушир — иштягьни авай, незвай затIунин дадни гьиссзавай. Къвезвай азарлуйрин кьадарни артух жезвайвиляй, духтурди зун кIвализ ахъаюн лазим тир. Пакамахъ вилер ахъайдалди, зи япарихъ чи палатадин духтурдин ван галукьна: “..Кьенва, атана мейит хутах”, — лугьузвай ада. Вилер ахъайна, ам телефондай рахазвай. Зи кIвачерихъ галай койка ичIи тир. Йифиз гьал пис хьайи даргиви дишегьли реанимациядиз хутахнавай кьван. Гьайиф хьи, ам къутармишиз хьанач.
Гьа инлай зи рикIик акатай къайи фул къени хкатзавач…
