Ихьтин лишандик кваз са шумуд югъ идалай вилик “Ахцегь” санаторийда дишегьлийрин некIедин железадин (цIумаруфдин) — хурарин ракдихъ галаз женг чIугунихъ элкъуьрнавай серенжем кьиле тухвана. Къейд ийиз кIанзава хьи, ихьтин серенжемар неинки республикадин меркез тир Махачкъалада, гьакIни райцентрайрин больницайрани тухун эхиримжи йисара хъсан адетдиз элкъвенва.
Гьайиф хьи, дишегьлияр рак азардикди начагъ хьунал гьалтайла, некIедин железадин онкология 1-чкадал ала. Гьаниз килигна “Жегьре рангунин лент” серенжемдин макьсад хурарин ракдин вилик пад кьун, дишегьлийри чпин сагъламвилин къайгъударвал ийиз рикIелай ракъур тавуникай ибарат я. Медицина санал акъвазнавачтIани, ада йигин еришдалди виликди еримишзаватIани, инсан кьиникьал гъизвай ракдин азардикай хуьдай ва я сагъардай дарман гьелелиг авач. Гьавиляй гьар са касди вичин бедендин сагъламвал вахтунда ахтармишунихъ, азар дериндиз фидалди дуьздал акъудиз хьунихъ къенин юкъуз еке метлеб авайди рикIелай ракъурна виже къведач.
ИкI, кишдин, дишегьлияр кIвалахдикай азад юкъуз, Ахцегьа, винидихъ тIвар кьунвайвал, “Ахцегь” санаторийда и серенжемдиз талукь тир мярекат Ахцегь ЦРБ-дин духтуррин иштираквал аваз тешкилнавай.
Санаторийдин залда и идарада зегьмет чIугвазвай дишегьлийрилай гъейри, Ахцегьрин ва Къурукаларин хуьрерин дишегьлийрини иштиракзавай. Мярекат, адан мана-метлебдикай суьгьбет авуналди ва мугьманар хушдиз къабулуналди, санаторийдин кьилин духтур Жамиля Зейналовади ачухна. Ахпа Ахцегь ЦРБ-дин гинеколог Фатима Мисиевади, педиатр Махтум Асаевади ва санаторийдин медсестраяр тир Лейла Бабаевадини Анеля Назировади кIватI хьанвай дишегьлийриз некIедин железадин ракдиз талукь докладар кIелна, азардикай, адан фендигарвиликай суьгьбетна, кIватI хьанвайбурун суалриз жавабар гана.
— Идалай виликан йисарни кваз гила чна и мярекат дуьз вад лагьай сеферда кьиле тухузва. “Жегьре рангунин лент” серенжемди жемиятдин дикъет дишегьлийрин уьмуьр ва сагъламвал хаталувилик кутазвай дакIундал (опухоль), чIуру азардал желбзава. Чи мярекатдин ва санлай “Жегьре рангунин лент” серенжемдин кьилин макьсад хаталу азардин вилик пад кьун, ам жезмай кьван фад (1 ва 2-стадийра) дуьздал акъудун я. Сир туш, сифтегьан девирра азар тамамдаказ сагъариз хъжезва. Идалайни гъейри, чи макьсад дишегьлияр хурарин рак азардикай хъсандиз хабардар авун я. И жигьетдай дишегьлийриз чпихъ гелкъвез ва азар чпивайни чириз жедайвал абуруз чирвилер гунихъ еке важиблувал ава. Гьакъисуз ийизвай диагностикадик маммография ва духтур-маммологдин меслятар (консультация) акатзава. Четин тушир и процедурайри дишегьли кьиникьал гъидай и азардикай хуьзва. Хурун железайрин дакIун — рак вахтунда винел акъудиз хьунилай дишегьлидин уьмуьр аслу жезва, — къейдна Жамиля Зейналовади.
Дашдемир Шерифалиев
