Играми ватанэгьлияр!
2022-йис патал “Лезги газет” кхьидай вахт алукьнавайдакай чна виликдай хабар ганай. И кар фикирда кьуна, шаз хьиз, редакцияди цIини “Лезги газет” — гьар са кIвализ” серенжем малумарзава.
Шаз и серенжемдин куьмекдалди чпихъ мумкинвилер авай гзаф кьадар жумарт стхайрини вахари чпин хуьруьнвийриз, мукьва-кьилийриз, чирхчирриз газетар кхьена, хайи чIал хуьник кьетIен пай кутуна. Гьахьтин заха ватанэгьлияр цIини майдандиз экъечIдайдак чна умудар кутазва.
Эгер квезни и серенжемдик куь пай кутаз кIанзаватIа, редакциядихъ галаз телефондин и нумрадин — 8928-584-16-72 — куьмекдалди алакъадиз экъечIиз жеда.
“Лезги газет” республикадин 100 йис хьанвай милли газетрикай сад я. Ана лезги халкьдин тарихдиз, чIалаз, диндиз, медениятдиз, эдебиятдиз, сиясатдиз ва маса месэлайриз талукь макъалаяр чапзава. Редакцияди хайи чIал хуьниз иллаки кьетIен фикир гузва. Мисал яз, гьар йисуз мектебра кIелзавай аялрин арада лезги чIалай олимпиадаяр, конкурсар тешкилзава, чIал чириз куьмекдай махсус ктабар акъудзава, газет кIелзавайбурун арада жуьреба-жуьре конкурсар ва маса мярекатар тешкилзава.
Эхиримжи йисара “Лезги газет”, тираждал гьалтайла, Дагъустандин государстводин СМИ-рин арада сад лагьай чкадал. Им, сифте нубатда, газет кхьизвай баркаллу лезги халкьдин агалкьун я. Гуьгъуьнай къвезвай йисарани, Аллагьдин куьмекдалди, чна и дережа хуьз жедайдак умудар кутазва.
Чна квез “Лезги газет” — гьар са кIвализ” серенжемдик куь пайни кутуниз эвер гузва!
“Лезги газет”
